Volkov Pavlovichning turtib yuborganiga munosabatini bildirdi

Oqshomning co-main event jangi og'ir vazn toifasida o'tkazilib, unda rossiyalik ikki aralash yakkakurash ustasi Aleksandr Volkov va Sergey Pavlovich o'zaro oktagonda to'qnash keldi. To'liq uch raund davom etgan rus derbisida "Drago" Volkov hakamlarning yakdil qarori bilan 29-28, 30-27, 30-27 hisoblarida g'alaba qozondi. 

Jang yakunlanganidan keyin Aleksandr Volkov hamyurtiga dalda bo'lish, jang uchun rahmat aytishga borganida, Pavlovich uni kutilmaganda itarib yubordi. Sergeyning qo'lini siqib qo'yishni maqsad qilgan Volkov kutilmagan javobga munosabatini bildirdi. 

"U nima uchun jangdan keyin meni turtib yuborganini bilmadim. Men yaxshi jang uchun unga minnatdorlik bildirish uchun borgan edim. Lekin u o'sha paytda jahl otiga mingan edi. Biz ilgari u bilan birga sparringlar o'tkazgandik. Uning xarakterini bilardim. Bu jangga alohida tayyorgarlik ko'rgandim. Sergey chap qo'l zarbalarimga tayyor emasdi", — dedi Volkov.