“Women’s Chess Championship 2025”. Derbida Afruzani mag'lub etishdi, bugun g'olib va sovrindorlar aniqlanadi

Musobaqada dunyoning 14 davlatidan 150 nafarga yaqin ayol shaxmatchi bosh sovrin uchun bahs olib boryapti. Kecha 8-tur uchrashuvlari o'tkazildi. Yoshlar o'rtasida ikki karra jahon chempioni Afruza Hamdamova biroz kutilmaganda yana bir istedodli shaxmatchimiz Guldona Karimovaga imkoniyatni boy berib qo'ydi. 

Yana bir o'zbek derbisida Nilufar Yakubboeva oq donalarda Umida Omonova bilan murosaga keldi. Marjona Malikova oq donalarda eronlik Melika Mohammadiga yutqazib qo'ydi. Musobaqaning birinchi tartib raqamli shaxmatchisi, rossiyalik Polina SHuvalova peshqadam, polshalik grossmeyster Alisiya Slivichka bilan durang qayd etdi. Rossiyalik grossmeyster, Olimpiada va jahon chempioni Olga Girya vatandoshi Anna SHuxmandan engildi. 

Bu turda hamyurtlarimizdan Nodira Nodirjonova, Maftuna Bobomurodova, Ruqiya Olimova raqibalariga yutqazib qo'yishdi. Bugun o'tkaziladigan so'nggi tur oldidan turnir jadvalida qo'shhokimlik yuzaga keldi. Alisiya Slivichka hamda Anna SHuxman 6,5 tadan ochko jamg'arib, birinchi va ikkinchi o'rinlarni band etishgan. Rossiyaliklar Polina SHuvalova va Anastasiya Bondaruk hisobida 6 tadan ochko bor. 

SHaxmatchilarimiz orasida eng yaxshi natijaga Guldona Karimov ega bo'lib turibdi. U kechagi g'alabasi evaziga 8 imkoniyatdan 5,5 ochko jamg'arib, turnir jadvalida qo'shimcha ko'rsatkichlarga ko'ra 8-o'ringa ko'tarilib oldi. Beshinchi pog'onadagi Olimpiada va jahon chempioni Olga Girya hisobida ham 5,5 ochko bor. Umida Omonova 5,5 ochko bilan qo'shimcha ko'rsatkichlarga ko'ra 5-o'rindan 9-pog'onaga tushdi. Besh ochkoga ega Nilufar Yakubboeva 13, 4,5 ochko bilan qolgan Afruza Hamdamova 15-o'rindan joy olgan. 

Ayni daqiqalarda “Women’s Chess Championship 2025” turnirida so'nggi 9-tur partiyalari o'ynalmoqda. Yana bir o'zbek derbisida Umida Omonova oq donalarda Guldona Karimovaga qarshi bahs olib boryapti. Nilufar Yakubboeva qora donalarda rossiyalik Varvara Polyakova bilan hisob-kitob qilmoqda.