“Women’s Chess Championship 2025” yakunlandi. SHaxmatchilarimiz sovrinli o'rinlarni band etishdimi?

Musobaqada dunyoning 14 davlatidan kelgan 150 nafarga yaqin ayol shaxmatchi ikki guruhda bosh sovrin uchun bahs olib bordi. So'nggi 9-tur uchrashuvlarida g'olib va sovrindorlar aniqlandi. "A" guruhida bosh sovrin polshalik Alisiya Sliviskaga nasib etdi. U 9-turda qora donalarda o'ynashiga qaramay, rossiyalik Anastasiya Bondarukni mag'lubiyatga uchratdi. To'qqiz imkoniyatdan 7,5 ochko jamg'argan Alisiya “Women’s Chess Championship 2025” chempioniga aylandi. Vatandoshi Polina SHuvalova bilan durang o'ynagan rossiyalik Anna SHuxman 7 ochko bilan ikkinchi o'rinni egalladi. 

Uch nafar shaxmatchi - Polina SHuvalova, Leya Garifullina va hamyurtimiz Umida Omonova 6,5 tadan ochko to'pladi. Faqat qo'shimcha ko'rsatkichlarga ko'ra SHuvalova sovrinli uchinchi o'ringa ega chiqdi. Omonova 5-o'rinni band etdi. U so'nggi turda yana bir shaxmatchimiz Guldona Karimovadan ustun kelgandi.      

Yoshlar o'rtasida ikki karra jahon chempioni Afruza Hamdamova 9-turda yana bir vakilamiz Marjona Malikovani taslim etdi. Nilufar Yakubboeva qora donalarda rossiyalik Varvara Polyakova bilan murosaga keldi. Besh yarimtadan ochko jamg'argan Guldona Karimova 11, Afruza Hamdamova 12, Nilufar Yakubboeva 16-o'rin bilan kifoyalandi.     

Etiborlisi, musobaqaning "B" guruhida sovrinli o'rinlarning bari o'zbekistonlik shaxmatchilarga nasib etdi. Maftuna Mamatqulova 9 imkoniyatdan 8 ochko to'plab, ushbu guruh g'olibasiga aylandi. Robiyaxon Sardorova 7,5 ochko bilan ikkinchi o'rinni egallagan bo'lsa, 7 ochkoga ega SHohina Ahmedova kuchli uchlikka yakun yasab berdi.