World Boxing Kubogi. Gap sonda emas, sifatda! To'rt bokschimizdan uch nafari shohsupada!

Ushbu nufuzli musobaqada jahonning 49 davlatidan kelgan 400 nafar bokschi medallar yo'lida ringga ko'tarildi. Yurtimiz sharafini Elshod Rasulov murabbiyligidagi O'zbekiston terma jamoasining to'rt nafar bokschisi himoya qildi. Ulardan birgina -51 kg vazndagi bokschimiz Feruza Kazakova germaniyalik Maksi Klozega imkoniyatni boy berib, turnirni medalsiz yakunladi. 

Qolgan uch bokschimiz Braziliyadan medal bilan qaytadigan bo'ldi. -48 kg vazn toifasidagi vakilamiz Farzona Fozilova hal qiluvchi final jangida meksikalik Fatima Errerani 4:1 hisobida mag'lubiyatga uchratib, dastlabki oltin medalni terma jamoamizga taqdim etdi. 

O'zbekistonning 2025 yildagi eng yaxshi ayol sportchisi Navbahor Hamidova esa final jangida qozog'istonlik ikki karra jahon chempioni Aida Abikeevani 5:0 hisobida taslim etdi. Bu bilan Hamidova o'tgan yili Liverpuldagi Jahon chempionati finalidagi mag'lubiyat uchun qozog'istonlik raqibasidan munosib revansh oldi. Navbahor World Boxing Kubogining ikki karra g'olibasiga aylandi.  

Og'ir vazndagi charm qo'lqop ustamiz Jahongir Zokirov World Boxing Kubogida bronza medaliga sazovor bo'ldi. Hakamlar 1/2 finalda armanistonlik tajribali raqib David CHaloyanga 3:2 hisobidagi g'alabani taqdim etishgandi. 

SHu tariqa, O'zbekiston terma jamoasi 2 ta oltin, 1 ta bronza medali bilan umumjamoa hisobida oltinchi o'rinda yakunladi. To'rt nafar bokschi bilan qatnashgan davlat terma jamoasi uchun bu juda ham yaxshi natija. Braziliya 4 ta oltin, 5 ta kumush medal bilan birinchi o'rinni band etdi.