World Boxing. To'rt bokschimiz finalda! Zokirov qozog'istonlik raqibiga imkon bermadi

Musobaqaning to'rtinchi kun dasturida 5 nafar bokschimiz 1/2 final janglarida ringga chiqdi. Parij-2024 Olimpiadasi ishtirokchisi To'rabek Habibullaev (-90 kg) hindistonlik Vishalga hech qanday imkoniyat qoldirmadi - 5:0. Eng og'ir (+90 kg) vazndagi charm qo'lqop ustamiz Jahongir Zokirov qozog'istonlik Daniyal Saparbaydan 5:0 hisobida ustun keldi. 

Bokschilarimizning yarim finaldagi ishtirokini boshlab bergan Madiyar Daniyarov (-60 kg) mezbon bokschi Luis Oliveyraga imkoniyatni boy berib qo'ydi va bronza medaliga sazovor bo'ldi. Asilbek Jalilov (-50 kg) hindistonlik Jadumani Mandengbamni, Fazliddin Erkinboev (-75 kg) polshalik Mixal Yarlinskini taslim etib, finalga yo'l oldi. 

Bokschilarimiz ishtirokidagi janglar natijasi:

-60 kg: Madiyar Daniyarov – Luiz Oliveyra (Braziliya) 1:4

-90 kg: To'rabek Habibullaev – Vishal (Hindiston) 5:0

-50 kg: Asilbek Jalilov – Jadumani Mandengbam (Hindiston) 3:2

-75 kg: Fazliddin Erkinboev – Mixal Yarlinski (Polsha) 4:1

+90 kg: Jahongir Zokirov – Daniyal Saparbay (Qozog'iston) 5:0