Xalqaro sport festivalida yurtimiz yoshlari faxrli o'rinni egalladi

Unda 11 mamlakatdan kelgan terma jamoalar tarkibidagi 483 nafar o'quvchilar qatnashdi.

Xalq talimi vazirligi xabariga ko'ra, sport festivalida O'zbekiston, Armaniston, Ozarbayjon, Rossiya, Tojikiston, Ukraina, Turkmaniston, Belarus, Moldova, Qozog'iston hamda Qirg'iziston davlatlari maktab o'quvchilari sportning badminton, basketbol, voleybol, mini-futbol, stol tennisi, shaxmat hamda mini suv polosi turlari bo'yicha bellashdilar.

Yurtimiz sharafini himoya qilgan, yurtimizda o'tkazilgan “Yoshlik sport jamoalari” sport musobaqalarida g'olib bo'lgan Jizzax viloyati Zarbdor tumani 2-, 3-, 9- maktab o'quvchilaridan shakllantirilgan 8 nafar sportchi qizlar ushbu festivalda sportning voleybol turi bo'yicha faxrli uchinchi o'rinni qo'lga kiritdi.

Tatariston Respublikasi Sport vazirligi matbuot xizmati bergan malumotga ko'ra, musobaqalardan so'ng sportchilar Qozonning diqqatga sazovor joylariga sayohat qildi. So'ngra taniqli sportchilar haqidagi film namoyishi va tashkil etilgan mahorat darslarida ishtirok etishga muvaffaq bo'ldi.