Xavi O'zbekistonga kelishi mumkin, "Nasaf" OCHL guruh bosqichida o'ynaydigan bo'ldi

"Ajdarlar" bugun Qarshidagi "Markaziy" stadionda Iordaniyaning "Al Faysali" jamoasiga qarshi o'yin o'tkazdi. 

Mezbonlarning to'liq ustunligi ostida kechgan o'yinda o'zbek jamoasi 5:1 hisobida g'alaba qozondi va Osiyo chempionlar ligasining guruh bosqichiga yo'llanma oldi. 

O'yinga to'xtaladigan bo'lsak, bahs "Nasaf"ning ustunligi ostida boshlandi. Bu esa o'z samarasini bermay qolmadi. Uchrashuvning 12-daqiqasida Igor Golban burchakdan etkazib berilgan zarbani boshi bilan golga aylandira oldi. Ikkinchi gol ham birinchisiga o'xshash bo'ldi. 49-daqiqada Jasur Hasanovning burchakdan oshirgan to'pini kechagina Osiyo chempionatidan qaytib, jamoa safiga qo'shilgan Bobir Abdiholiqov boshi bilan raqib darvozasini ishg'ol etdi. Oradan uch daqiqa o'tib, 52-daqiqa o'tib borayotgan bir paytda Azizjon G'aniev ajoyib zarba evaziga oradagi farqni yiriklashtirdi. 61-daqiqada raqib futbolchilari jarima maydonchasi ichida Islom Kenjaboevga nisbatan o'yin qoidasini buzdilar. Penaltidan esa Dragan CHeran unumli foydalandi va hisobni 4:0 ko'rinishiga olib keldi. 86-daqiqada esa raqib futbolchisi to'pni o'z darvozasiga kiritib, avtogol muallifiga aylandi. Qo'shib berilgan daqiqalarda esa mehmonlar futbolchisi Alban Mehan gol kiritib, hisobni biroz qisqartirdi.

Ushbu g'alaba "Nasaf"ga Osiyo chempionlar ligasining guruh bosqichida ishtirok etish imkoniyatini taqdim etdi. 

Jamoamiz endi "S" guruhidagi o'yinlarda ishtirok etadi. Ushbu guruhdan "Persipolis" (Eron), "Al Sadd" (Qatar), "Al Vasl" (BAA) jamoalari o'rin olgan. 

Qatarning "Al Sadd" jamoasi tarkibida ispaniyalik futbolchi, "Barselona"ning sobiq azosi Xavi to'p tepadi. U "Nasaf"ga qarshi bo'ladigan o'yinda yurtimizga tashrif buyurishi mumkin.