Xivada uzoq kutilgan “Bahodirlar o'yini” boshlandi FOTO

Musobaqaning tantanali ochilish marosimi Xivaning “Ichan qala”tarixiy majmuasiga olib kiruvchi Ota darvoza oldida bo'lib o'tdi. Tadbirda O'zbekiston Respublikasi Turizmni rivojlantirish davlat qo'mitasi, Jismoniy tarbiya va sport vazirligi, Xorazm viloyati va Xiva shahri hokimligi hamda Xalqaro va O'zbekiston Bahodirlar o'yinlari va tosh ko'tarish federaciyalari vakillari, shuningdek, ommaviy axborot vositalari xodimlari, sport muxlislari va sayyohlar ishtirok etdilar.

O'z navbatida so'zga chiqqan Xiva shahar hokimi Sobirjon Jumaniyozov va boshqalar musobaqaning ahamiyati haqida fikr bildirib, bellashuvlarning yuqori saviyada o'tishiga ishonch bildirishdi. SHundan so'ng, xorazmlik sanat ustalari ishtirokida madaniy dastur namoyish etildi. Ochilish tantanalari tugagach, sportchilar Pahlavon Mahmud qabrini ziyorat qilishga yo'l olishdi. 

“Bahodirlar o'yinlari”da dunyoning eng sara 15 ta sportchisi ishtirok etmoqda. Jumladan, Pavlo Kordiyako(Ukraina), Cxu Xuang(Xitoy), Djeremi Xogg(Avstraliya), Aleksandr Kuzmin(Rossiya), Vagner Meneses Dos Santoz(Braziliya), Vusal Mardonov(Ozarbayjon), Reza Gjaetasi(Eron), Ioannis Papakalas(Greciya),    Aikram Singx(Hindiston), Micuki Toyota(Yaponiya), Sergey Trubicin, Hamza Primov, G'iyosiddin Ahmedov, SHuhrat Alixanov(hammasi O'zbekiston)lar g'oliblik uchun kurashmoqda.

Nihoyat, dastlabki bellashuv bo'lib o'tdi. Unda qatnashchilar “Qo'qon arava” deb nomlangan mashqni tezkorlik bilan bajarish bo'yicha kuch sinashishdi. Qoidaga ko'ra, sportchilar har birining ichiga og'irligi 100 kilogrammdan qum to'ldirilgan 2 ta qopni aravaga yuklab, belgilangan masofaga eltib qo'yishi lozim bo'ldi. Ayni damda, turnir dasturidan o'rin olgan musobaqalar davom etmoqda.

Ikrom Xudoyberganov