Xivada yosh merganlar bellashishdi FOTO

Xorazm viloyati kubogining 3-bosqichida 2001 yilda tug'ilgan va undan kichik yoshdagi sportchilar merganlik mahoratini namoyish etishdi. Xiva tumani o'quv sport texnika klubi(O'STK)ning o'q otish tirida o'tkazilgan mazkur musobaqada 17 ta jamoaning 70 nafar yosh sportchisi merganlik mahoratini sinovdan o'tkazdi.   

Hayojonli daqiqalarga boy kechgan musobaqa yakuniga ko'ra, pnevmatik miltiqdan o'q otish birinchiligining qizlar bellashuvida O'zbekiston o'q otish sporti federaciyasi viloyat bo'limi azosi Sara Sotipova g'oliblikni qo'lga kiritdi. 

Urganch tumani O'STK jamoasi sportchilari SHahnoza Masharipova shohsupaning ikkinchi, Bekposhsha Otaboeva uchinchi pog'onasini egalladi. O'g'il bolalar bahsida Bog'ot tumanidagi “Ravon” O'STK jamoasi vakili Javohir Ro'zmetov g'olib chiqdi. Keyingi sovrinli o'rinlar   Urganch tumani jamoasidan Bekzod Ro'zmetov va O'zbekiston o'q otish sporti federaciyasining viloyat bo'limi jamoasidan Diyorbek Ochilovga nasib etdi.

Pnevmatik to'pponchadan o'q otish mashqini bajarishda Iroda Otanazarova (Urganch tumani) zafar quchdi. SHukurjon Odamboeva (SHovot tumani O'STK) ikkinchi, Aziza Ismoilova (Urganch shahar O'STK) uchinchi o'rindan joy oldi. 

Ushbu yo'nalishning o'g'il bolalar birinchiligida shovotlik Nusrat Saparboev muvaffaqiyat qozondi. Hazorasplik Abduvohid Abdullaev, Xiva tumanining “Karvon” O'STK jamoasidan Xolbek Ollayorovlar sovrindor bo'lishdi. 

Endilikda, eng yaxshi natija ko'rsatgan xorazmlik yosh merganlar 26-30 iyun kunlari Andijon shahrida tashkil etiladigan O'zbekiston kubogining 3-bosqichida voha sharafini himoya qilishadi.

Bu musobaqaning ahamiyatli tomoni yana shunda bo'ldiki, Xivaga tashrif buyurgan sportchilar, ularning murabbiylari ichki turizm doirasida  qadimiy shaharning tarixiy obidalari va yodgorliklarini ham tomosha qilishdi. 

Ikrom XUDOYBERGANOV tayyorladi