Xokkaydo shahri zamonaviy beshkurashchilarimizni qabul qiladi

Ana endi O'zbekiston zamonaviy beshkurash federaciyasi oldida licenziya olgan ikki nafar vakilimizni bo'lajak Olimpiya o'yinlariga munosib tayyorlash vazifasi turibdi. Ayni shu masalalar yuzasidan O'zbekiston zamonaviy beshkurash federaciyasi Bosh kotibi Kseniya Gulyamova Yaponiya Vazirlar Mahkamasining Tokio-2020 Olimpiya va Paralimpiya o'yinlari bo'yicha departament rahbarining o'rinbosari Miki Kamura bilan uchrashdi. 

Uchrashuvda “Mezbon shahar tashabbusi” dasturi muhokama qilindi. Mazkur dastur o'zida Tokio-2020 yo'lida sportchilarni qo'llab-quvvatlash va mehmondo'stlik g'oyalarini targ'ib qiladi. SHuningdek, uning doirasida millatlararo madaniyat almashinuvi, iqtisodiy hamkorlik masalalari ham ko'rib chiqiladi. 

Ayni paytgacha Yaponiyaning Nagoya, Maydzuru va Takasaki shaharlari Olimpiya o'yinlaridan avval o'zbek sportchilarini o'quv-mashg'ulot yig'inlarini o'tkazish uchun qabul qilishlari borasida kelishuvga erishilgan edi. Mazkur uchrashuvdan so'ng ushbu shaharlar orasiga Xokkaydo ham qo'shildi. Bu erda beshkurashchilarimiz o'quv-mashg'ulot yig'inlarini o'tkazib, Olimpiya o'yinlariga qadar mahalliy iqlimga moslashib olishadi.  Ushbu shahar ot sportining konkur yo'nalishi bo'yicha yirik musobaqalardan birini qabul qiladi va beshkurashchilarimiz shug'ullanishi uchun munosib joydir. 

Malumot uchun, ayni paytda zamonaviy beshkurash bo'yicha terma jamoamiz Kiprning Limassol shahrida o'quv-mashg'ulot yig'inini olib bormoqda. Federaciya mutasaddilari esa sportchilarimizning Olimpiya o'yinlariga munosib tayyorlanishlari uchun barcha sharoitlarni yaratishga urinmoqda.