Xorazm viloyati sportchilari uchun onlayn mashg'ulot tashkil etildi

Barchaga malum, hozirgi vaqtda yurtimizda qatiy karantin holati davom etmoqda, ammo shunga qaramasdan O'zbekiston stol tennisi federaciyasi vakillari sportchilarning mahoratlarini oshib borish maqsadi «ZOOM» ilovasi orqali onlayn mashg'ulotlarni tashkil etishda davom etmoqda. Bu safargi onlayn mashg'ulotda Xorazm viloyati terma jamoasi murabbiylari va sportchilari ishtirok etishdi. Mashg'ulotni Xorazm terma jamoasi murabbiyi Farruh Rajabov olib bordi. Tadbirni federaciya rahbariyati kuzatib bordi.

«Bugungi holatda hech kimga oson bo'lmayapti. Karantin sababli barcha musobaqalar, mashg'ulotlar va tadbirlarni onlayn o'tkazmoqdamiz. Hozirda davom etayotgan qiyin holatga qaramasdan, to'liq kuch bilan ishlayotgan federaciya xodimlari, barcha murabbiylarga minnatdorchilik bildiraman. Karantin qachon tugashini hech kim bilmaydi, shu sababli onlayn tarzda mashg'ulotlarni davom ettirishimiz kerak. Sababi hech bir stol tennischimiz jismoniy xolati va texnikasini yo'qotmasligi lozim. Karantin vaqtida bir nechta musobaqalar tashkil etildi va hozirda 10 -14 yosh toifasida navbatdagi onlayn turnir davom etmoqda», - deydi O'zbekiston stol tennisi federaciya raisi Saida Mahmudova.

Onlayn mashg'ulot davomida yosh tennischilarimiz uchun Osiyo stol tennisi federaciyasi tomonidan tayyorlangan o'quv-qo'llanma ham namoyish etildi. Bu qo'llanma orqali stol tennischi va murabbiylar o'zi uchun kerakli va foydali maslahatlarini olishga muvaffaq bo'ldi.

«To'g'ri hozir karantin, lekin bu degani mashg'ulotlarni to'xtatib qo'yishimiz kerak degani emas. Har bir stol tennischi uchun alohida mashg'ulot dasturi ishlab chiqilgan va bularni barchasini onlayn tarzda kuzatib bormoqdamiz»,- dedi viloyat terma jamoasi murabbiyi Farruh Rajabov.

Tadbir yakunida ishtirokchilar o'zlarini qiziqtirgan savollariga mutaxassislardan batafsil javob oldilar.