Xorazmda sportning texnik va amaliy turlari rivojiga etibor oshmoqda

Buning barobarida, vohada sportning texnik va amaliy turlarini yanada rivojlantirish, uning ommaviyligini oshirish yo'lida izchil say-harakatlar amalga oshirilayotir. Sport sekciyalari faoliyatini, shuningdek, uning moddiy-texnika bazasini yanada yaxshilash, zamonaviy sport anjomi va jihozlari bilan taminlash, sekciyalarga yoshlarni kengroq jalb qilish asosiy vazifalardan biriga aylangan.

Binobarin, bugungi kunda O'zbekiston Respublikasi mudofaasiga ko'maklashuvchi “Vatanparvar” tashkiloti Xorazm viloyati kengashi tizimidagi viloyat texnik va amaliy sport turlari markazi, Hazorasp avtomobil maktabi, Urganch avtomobil sport texnika maktabi unitar korxonasi hamda o'quv sport texnika klublari (O'STK) qoshidagi sekciyalarda sportsevar yoshlar  o'zlari mehr qo'ygan yozgi biatlon, duatlon (triatlon), pnevmatik quroldan o'q otish, motokross, karting, parashyut sporti, aviamodel, raketamodel singari sport  turlarining asl sir-asrorlarini katta qiziqish va ishtiyoq bilan o'zlashtirishyapti. Mashg'ulotlardan tashqari, belgilangan reja asosida uyushtirilayotgan musobaqalar ularning tajriba va mahoratini maromiga etkazishga xizmat qilayotir.

Kezi kelganda takidlab o'tish joizki, o'tgan davr mobaynida yozgi biatlon ustalari Darmonjon Ro'zmetova va Kumushoy Matyoqubova O'zbekiston terma jamoasi safida bir necha bor Osiyo chempionati hamda nufuzli xalqaro musobaqalarda qatnashib, g'olib va sovrindorlar qatoridan joy olishdi. Yoqutoy Jumaboeva triatlon bo'yicha, Dilafruz Sayidova duatlon bo'yicha, Maqsuda Kerimova pnevmatik to'pponchadan o'q otish bo'yicha, Sara Satipova pnevmatik miltiqdan o'q otish bo'yicha O'zbekiston chempioni bo'ldi.

Ayniqsa, pnevmatik miltiqdan o'q otish sporti bo'yicha Olima Komilova qo'lga kiritayotgan natijalar salmoqliligi bilan ajralib turadi. U hozirgacha O'zbekiston terma jamoasi tarkibida xalqaro miqyosdagi musobaqa va turnirlarda vatanimiz sharafini munosib himoya qilmoqda.  Qolaversa, o'tgan yili xorazmlik avtopoygachilar respublika musobaqalarida ilk bor ishtirok etganiga qaramay, sovrindorlar safiga kirishni uddalashdi.

Mubolag'a emas, hozirda ham voha sportchilari orasidan ko'plab respublika musobaqalarining g'olib va sovrindorlari etishib chiqmoqda. Ayni damda, duatlonchi va triatlonchilar  Dilafruz Sayidova, Mahliyoxon Xudoyberganova, Zulayho Jumaboeva, Hasanboy Tangriberganov, pnevmatik quroldan o'q otish ustalari Sara Satipova, SHahnoza Masharipova, Aziza Ismoilova, Diyorbek Ochilov, kartingchi Angel Lucenko, Abror Erkinov, yozgi biatlonchilar Kumush Matyoqubova, Odamboy Rahimov, Havojon Rahimova singari ko'plab vohalik sportchilar respublika chempionati, birinchiligi hamda kubogi musobaqalarida voha sharafini munosib himoya qilishayotir.

O'z navbatida yuqori ko'rsatkichlarga erishayotgan sportchilar O'zbekiston Respublikasi mudofaasiga ko'maklashuvchi “Vatanparvar” tashkiloti tashkil topgan kun  va boshqa qutlug' sanalar munosabati bilan rag'batlantirilmoqda. Tabiiyki, sportchilarga qaratilayotgan etibor besamar qolmayapti,  ularni yangi-yangi marralar sari etaklamoqda.

Ha aytgancha, O'zbekiston chempionatlarining g'olib va sovrindorlari safidan joy olayotgan xorazmlik sportchilar imtiyozli ravishda oliygohlarga kirish imkoniyatiga ega bo'lishmoqda. O'tgan yili to'rt nafari ana shunday sharafga loyiq ko'rildi. Xususan, bir nafari Toshkent davlat jismoniy tarbiya va sport universitetiga, uch nafari Urganch davlat universitetiga davlat granti asosida o'qishga kirdi.

Ikrom XUDOYBERGANOV, Xorazm viloyati