Xorazmda “Yoshlar daftari”ga kiritilgan yoshlar bellashishdi + FOTO

O'zbekiston Mudofaasiga ko'maklashuvchi “Vatanparvar” tashkiloti Markaziy kengashi tizim faoliyatini yanada yuksaltirish, aholining turli qatlami, xususan, yoshlar o'rtasida sportning texnik va amaliy turlarining ommaviyligini oshirish, ularning jismonan sog'lom tarzda hayot kechirishini taminlash maqsadida izchil islohotlar olib borayotir.

Jumladan, “Yoshlar daftari”ga kiritilgan yoshlarni kasbga yo'naltirish, buning barobarida, sport turlari bilan shug'ullanishlariga keng imkoniyat va shart-sharoitlar yaratib berish borasidagi say-harakatlar o'zining ijobiy samarasini bermoqda. Ayniqsa, ular o'rtasida pnevmatik quroldan o'q otish, yozgi biatlon va duatlon bo'yicha o'tkazilayotgan uch bosqichli respublika musobaqasi muhim ahamiyat kasb etyapti.

“Vatanparvar” tashkilotining Xorazm viloyat  texnik va amaliy sport turlari markazi tomonidan “Yoshlar daftari”ga kiritilgan yoshlar o'rtasida yuqorida qayd etilgan sport turlari bo'yicha uyushtirilgan viloyat bosqichi ham ana shu ezgu amallarni ro'yobga chiqishiga xizmat qiladi.

Ikki kun mobaynida bo'lib o'tgan pnevmatik quroldan o'q otish, duatlon va yozgi biatlon bellashuvlarining yakuniy sarhisoblariga ko'ra, umumjamoa hisobida Yangiariq tumani o'quv sport texnika klubi shohsupaning birinchi pog'onasiga ko'tarildi. Ikkinchi o'rinni Xiva tumani O'STK jamoasi egallagan bo'lsa, faxrli uchinchi o'rin SHovot tumani O'STK jamoasiga nasib etdi.

Endilikda, eng yaxshi natija qo'rsatgan vohalik sportchilar noyabr oyining ikkinchi o'n kunligida Toshkent viloyatida uyushtiriladigan respublika bosqichida o'z mahoratlarini sinovdan o'tkazishadi.

Ikrom XUDOYBERGANOV, Xorazm viloyatidan