“XVIII Tashkent Open” xalqaro shaxmat turniri yakunlandi. Kim nechanchi o'rinni egalladi?

Bu yil o'z tarixida 18-marotaba o'tkazilgan turnirning umumiy mukofot jamg'armasi 75 000 AQSH dollarini tashkil qildi. SHveycarcha tizimda 10 turdan iborat musobaqada dunyoning 20 ga yaqin davlatidan kelgan shaxmatchilar reytingiga qarab, ikki guruhda sovrinli o'rinlar uchun bahs olib borishdi. 

Kuchlilar jam bo'lgan A guruhida hindistonlik xalqaro grossmeyster Nihal Sarin (2687) birinchi raqam ostida saralangan bo'lib, u so'nggi 10-turda qora donalarda asosiy raqibiga aylangan hamyurtimiz SHamsiddin Vohidov (2670)ga qarshi o'ynadi. Uchrashuvda Sarinni g'alaba ham qoniqtirardi. SHamsiddin esa g'alaba qozongan taqdirda, musobaqa chempioniga aylanar edi. Yakunda Nihal o'zi uchun kerakli natija - durangga erishdi.

O'n imkoniyatdan 8 ochko jamg'argan Nihal Sarin Georgiy Agzamov xotirasiga bag'ishlab o'tkazilgan “XVIII Tashkent Open” xalqaro turniri g'olibiga aylandi. U chempionlik bilan birga 20 000 AQSH dollari miqdoridagi mukofot pulini ham qo'lga kiritdi. Vengriyalik grossmeyster Sanan Syugirov (2631) qo'shimcha ko'rsatkichlarga ko'ra 7,5 ochko bilan ikkinchi o'rinni egalladi. SHuncha ochkoga ega hindistonlik Puranik Abhimanyu (2636) kuchli uchlikka yakun yasab berdi.   

Afsuski, sovrindorlar kabi 7,5 ochko to'plagan SHamsiddin Vohidov qo'shimcha koeficentlarga ko'ra 5-o'rin bilan kifoyalandi. Yosh grossmeysterimiz turnirda ikkinchi raqamli shaxmatchi sifatida tasniflangan edi. Yana bir yosh shaxmatimiz Humoyun Begmuratov (2430) musobaqada ajoyib natija ko'rsatdi. U 7 ochko bilan qo'shimcha ko'rsatkichlarga ko'ra 9-o'rinni band etdi va eng muhimi, xalqaro grossmeyster talabini bajardi. Humoyun so'nggi turda qora donalarda hindistonlik grossmeyster Adhiban (2554) bilan durang o'ynadi. 

O'n imkoniyatdan 7 ochko jamg'argan hamyurtlarimizdan Almas Rahmatullaev (2413) qo'shimcha ko'rsatkichlarga ko'ra 13, Muhammadzohid Suyarov (2474) 15, Muhiddin Madaminov (2550) 16-o'rinni egalladi. Grossmeysterimiz Abdumalik Abdusalimov (2525) 6 ochko bilan 28-pog'ona bilan kifoyalandi.