Yoqubboevda durang, taqibchilar farqni qisqartirishdi

Aylana tarzda o'tkazilayotgan musobaqada 5 nafar xalqaro grossmeyster - Nodirbek Abdusattorov (2550, chempionatning birinchi raqamli ishtirokchisi), Saydali Yo'ldoshev (2469), Marat Jumaev (2451), Aleksey Barsov (2411) va Toxir Vohidov (2400) dona suryapti. 

O'n birinchi turda yosh shaxmatchi chempionat peshqadami Nodirbek Yoqubboev qora donalarda harakat qilib, Saidakbar Saydaliev bilan durang o'ynadi. Bundan yaqin taqibchilar unumli foydalanib qolishdi. Nikita Xoroshev Abdumalik Abdusalimovni, maktab o'quvchilari o'rtasida jahon chempioni Javohir Sindarov esa Elbek Jumanovni mag'lubiyatga uchratdi. 

Dunyo tarixidagi eng yosh ikkinchi xalqaro grossmeyster Nodirbek Abdusattorov bu safar ham durang bilan kifoyalandi. Abdusattorov tajribali grossmeyster Marat Jumaev bilan murosaga keldi. Akmal Fayzullaev grossmeyster Aleksey Barsovni engdi.

Bugun o'tkaziladigan 12-tur oldidan Nodirbek Yoqubboev 11 imkoniyatdan 8 ochko jamg'arib, yakka peshqadam bo'lib turibdi. Qo'shimcha ko'rsatkichlarga ko'ra ikkinchi o'rinda borayotgan Nikita Xoroshev hisobida 7 ochko bor. Javohir Sindarov ham 7 ochko jamg'argan. Marat Jumaev, Nodirbek Abdusattorov va Tohir Vohidov 6,5tadan ochkoga ega bo'lib turibdi.