Yosh shaxmatchilarimizning Batumidagi “triumfi”+FOTO!

O'z tarixida to'rtinchi bor o'tkazilgan Batumi festivalida 10ta davlatdan 37 nafar shaxmatchi dona surdi. Ular orasida o'zbekistonlik shaxmatchilar ham muvaffaqiyatli tarzda olimlashdi. 

Jumladan, Jahongir Komilov 8 yoshgacha shaxmatchilar musobaqasida 9 imkoniyatdan 8,5 ochko jamg'arib, xalqaro festival g'olibiga aylandi. O'n uch yoshli xalqaro master Javohir Sindarov (2474) esa 10-raqam ostida harakat qilganiga qaramay, asosiy turnirda 6 ochko bilan kuchli uchlikdan joy oldi. 

Sindarov 9ta partiyadan faqat bittasida gruziyalik xalqaro grossmeyster Levan Panculave (2575)ga 6-turda imkoniyatni boy berib qo'ydi. Javohir 4ta uchrashuvda g'alaba qozondi va yana shuncha partiyada durang o'ynadi.

Sindarov gruziyalik grossmeysterlar - Giga Guparashze va Davit Magxalashvili bilan murosaga keldi. Reytingda birinchi o'rinda turgan qozog'istonlik xalqaro grossmeyster Rinat Jumabaevni mag'lub etgani esa haqiqiy shov-shuvga sababchi bo'ldi. 

SHaxmatchilarimizdan Robiyaxon Sardorova C Open musobaqasida ishtirok etdi va 6,5 ochko bilan umumiy qatnashchilar orasida 5, ayol shaxmatchilar o'rtasida esa 1-o'rinni egalladi. 

Bundan tashqari, Batumi festivalida FM Ortiq Nig'matov (2461) va Bobur Sattorov (2328) ham o'z imkoniyatini sinovdan o'tkazdi. Endi shaxmatchilarimiz xuddi shu tarkib bilan 13-20 iyul kunlari Gruziyaning Poti shahrida o'tkaziladigan 13-xalqaro shaxmat festivalida ishtirok etishadi.