Yulduzlar ko'z o'ngida o'tgan Gulistondagi prof boks oqshomidan FOTOGALEREYA

"Alpomish" majmuasida o'tkazilgan professional boks turnirini bevosita Sirdaryo viloyati hokimi Akmaljon Mahmudaliev kuzatib bordi. Parij-2024 Olimpiadasi chempionlari Bahodir Jalolov, Abdumalik Halokov, Lazizbek Mullojonov, Olimpiadada yorqin jang namoyish etgan To'rabek Habibullaev, murabbiy-sekundant sifatida dovrug' qozongan Akmal Hasanov turnir mehmonlari sifatida janglarni tomosha qilishdi.

Oqshomning markaziy jangi 72 kg vaznda sirdaryolik Ramil SHukumerov hamda tojikistonlik Rasulbek Ahadov o'rtasida bo'lib o'tdi. To'liq davom etgan jangda SHukumerov ochkolar hisobiga ko'ra g'alaba qozondi. Jang davomida Rio-2016 Olimpiadasi chempioni Fazliddin G'oibnazarov Ramilni qo'llab-quvvatlab, unga ring tashqarisidan ko'rsatmalar berib turdi.

Bokschilarni taqdirlash marosimida O'zbekiston professional boks federaciyasi prezidenti Umid Yakubov, federaciya birinchi vice-prezidenti G'ofur Rahimov va boshqa mutasaddilar ishtirok etishdi.  

Kechagi prof boks turnirida Ulug'bek To'rabekov (Sirdaryo), Hayotbek Mashrabov (Farg'ona), Iqbol Salimov (Tojikiston), Islombek Mo'minov (Toshkent viloyati), Miralijon Mavlonov (Buxoro), Mirkomil Saytohunov (Andijon), Temurbek Xazratqulov (Sirdaryo) singari bokschilar g'alaba qozonishdi. Muhammadaziz O'ktamov (Farg'ona) va Faxriddin Mamatxo'jaev (Andijon) o'rtasidagi jangda durang natija qayd etildi.