Yurtimizda kriket turniri iliq qarshi olindi

Kun davomida yurtimizda polo bo'yicha dastlabki musobaqa o'tgani haqida xabar bergan edik. SHuningdek, hafta yakunida mamlakatimizga yangi kirib kelgan sport turlaridan biri kriket bo'yicha ham ilk turnir o'tkazildi.

Yurtimizda kriket federaciyasining tashkil topganiga ko'p vaqt bo'lmadi. Qisqa fursat ichida 2 nafar murabbiyimiz Hindistondagi kriket akademiyasida tahsil olib qaytishdi va hozir yurtimiz yoshlari bilan bilimlarini ulashmoqdalar. Hozirgi kunda mamlakatimizda “Barlos” va “Afrosiyob” kriket jamoalari faoliyati boshlangan. Kecha ushbu jamoalar “ANFA TASHKENT T20” musobaqasi doirasida kuch sinashishdi. Bellashuvni Milliy olimpiya qo'mitasi rahbariyati, shuningdek, Jismoniy tarbiya va sport vazirligi, O'zbekiston kriket federaciyasi mutasaddilari ham kuzatib borishdi. Aytish mumkinki, ushbu kriket musobaqasi yig'ilgan mutaxassislarda iliq taassurot qoldirdi. Dastlabki o'yinda “Barlos” jamoasining qo'li baland keldi.

Malumot uchun, O'zbekiston kriket federaciyasi O'zbekiston Respublikasi hududida kriket sport turini rivojlantirish va ommalashtirish, xalqaro talab va standartlar asosida kriket bo'yicha sportchilar, murabbiy va hakamlarni tayyorlash hamda kriket sporti bo'yicha musobaqalar o'tkazish faoliyatini amalga oshirib kelayotgan, davlat organlari va boshqa tashkilotlar tomonidan tan olingan nodavlat notijorat tashkiloti hisoblanadi. O'zbekiston kriket federaciyasi 2019 yil 29 noyabrda tashkil etilib, Adliya vazirligidan 910-sonli Guvoxnoma bilan ro'yxatdan o'tgan.