Интервью. "Қирғиз, қозоқ, мўғул эмас. Мен ўзбекнинг Алпомишиман!"

Биз Муродбек билан алоқага чиқиб, сухбат қуришга муваффақ бўлдик. Қуйида ушбу сухбатни эътиборингизга хавола этамиз.
- Муродбек сизга қуёшли Ўзбекистондан саломлар!
- Барча-барча ватандошларимга Ассалому алайкум деб қоламан! Жуда соғиндим Ўзбекистонни.

-Сиз ҳақингизда берган маълумотларимиздан кейин жуда кўп юртдошларимиз интервью олишимизни хоҳлашди. Бу даражада эътиборни тортаман деб ўйлаганмидингиз?
-Очиғи кутмаган эдим. "Youtube"да ёзилган фикрларни ўқиб бошим осмонга етди. Хайриоҳ бўлган барча юртдошларимга раҳмат айтиб қоламан. Бу менга янада куч-қувват бағишлади. Ўйлайманки, бу ерда миллатимиз, юртимиз шаънини муносиб ҳимоя қиламан.

-Аввалги хабаримизда баъзи маълумотлар хато кетиб қолганини "Facebook"даги шахсий профилимга ёзган экансиз. Келинг шунга ойдинлик киритайлик?
-Биласизми, ММА да 7 та жанг ўтказган эмасман. Аслида дебют қилдим. Ундан аввалги жангларим яккакурашни бошқа турларидан эди. Кейин, "Youtube"да Фёдор Емельяненконинг шогирди сарлавхаси остида берилибди. Тўғри бу сизнинг хатоингиз эмас. Шундай бўлсада, айтиб ўтишни лозим топдим. Тўғри, Фёдор Емельяненко билан учрашганман, яхши фикрлар билдирган. Аммо, унинг шогирди эмасман. “Қора бўри” ҳам эмасман. Менинг Муродбек қатори, туғилганимдаёқ пешонамга битилган исмим бор. Ҳамма Алпомиш деб атайди. Бунинг ўзига яраша тарихи бор, биринчидан, ўз ўрнида айтиб қўяй: "Мен ўзбекман ватандошлар!". Ушбу қардош халқларимизга ҳурматимни сақлаган ҳолда айтишим мумкинки, интернет тармоқларида қирғиз, қозоқ, мўғул ҳам дейишди. Аслида, ҳудди Алпомиш каби “Қўнғирот” уруғиданман. Иккинчидан, туғилганимда бобом исмимни шундай қўйилишини истаган. Муродбек деб қўйилгани билан доим Алпомиш деб атаб келишган.  Очиғи, ҳудди Фёдор Емельяненко орқали ўзимни танитиб олишни истагандек бўлиб қолдим. Аслида, мехнатим орқали халқни эътиборини қозонмоқчиман. Шунчаки ҳақиқий Алпомиш эканлигимни исботламоқчиман ҳалос! Қолаверса, хали ўз устимда жуда кўп ишлашим керак. Эндигина ММА да дебют қилдим. Нуфузли промоушенлар билан шартнома тузиб, кўплаб жанглар ўтказишим керак. Лекин, ўзимга ишонаман. Насиб қилса, ММА оламида ўз сўзимни айта оламан!

-Америка Қўшма Штатларида неча йилдан бери фаолият олиб борасиз? Умуман қандай бориб қолгансиз?
-Бу ерга оилам билан 8 ёшимда келганман. Шундан бери, шу ерда истиқомат қиламиз. Ватанимизни мана 12 йилдирки кўрганим йўқ!

-Эххе, унда болалик хотиралари ҳам ёддан кўтарилган бўлса керак?
-Йўқ асло, Қашқадарё вилоятининг Шаҳрисабз шаҳрида таваллуд топганман. Шаҳрисабзни жуда яхши эслайман. Тошкентни биламан. Чунки, у ерда ҳам маълум бир вақт яшаганмиз. Айниқса Шаҳрисабздаги “Оқсарой” ҳамон ёдимда. Умуман барчасини эслайман.

-Миллий таомларимизничи?
-Ох ох ох. Бу ерда ҳам уйда доимо миллий таомларимизни истеъмол қиламиз. Лекин, болаликдаги, ўзимизнинг юртни ҳавоси, сувидан тўйинган таомларни мазасини ҳозирга қадар эслайман! Айниқса, “Тандир кабоб”, “Палов”, “Манти”... Тўғриси иштахам очилиб кетди.

-Жангларингизни кўриб, кучли томонингиз “партер” эмаслигига ишонч ҳосил қилгандекмиз?
-Биласизми, аслида энг кучли томоним “партер” ҳисобланади. Чунки, асосан эркин кураш ва юнон – рум кураши билан шуғулланганман. Биламан бундай фикрга келишингизга жангларимда асосан оёқ ва қўл зарбаларим эвазига ғалаба қозонганим сабаб бўлган.

-Мураббийингиз ҳақида ҳам маълумот бериб ўтсангиз?
-Стивен Манн ҳамда Жесси Финней қўл остида машғулотлар олиб бораман. ММА йўналишида Жесси Финней устозлик қилади. Жуда тажрибали мураббийлар. Жаҳон чемпионларини тарбия қилган.

-Ўзбекистонга яқин орада келиш ниятингиз борми?
-Албатта, шу йил бориш истагидаман!

-ММА борасидаги жангни қайси йўналишда ўтказдингиз?
-Бу ерда ММАга жуда қизиқиш кучли. Кичик ташкилотлар жуда кўп. Гарчи кичик бўлсада, дунёнинг турли бурчакларидан жангчилар келади. Ушбу кичик-кичик йўналишлар, “Bellator”, “UFC”га трамплин вазифасини ўтаб беради. Ўзим билан бирга шуғулланган жуда кўпчилик ҳозирда “Bellator”да фаолият  юритишмоқда. Мен “SHAMROCK” йўналишидаги жангларда иштирок этаман. Бу йўналишнинг бу ерда рейтинги анча юқори саналади. Ҳали ёшман, энди 20 га кирдим. Яна икки-уч йил тажриба тўплаб нуфузли йўналишларга ўтаман.

-Кейинги жангингиз борасида нима дея оласиз?
-Бу борада ишлар олиб борилмоқда. Насиб бўлса, аниқ бўлиши билан хабар бераман.

-ММА даги дебют жангингизда ғалаба қозондингиз. Умуман рақибингиз борасида қандай маълумот бера оласиз?
-Тўғриси ҳозир у ҳақида ижобий фикрларни билдирсам, ўзимни ҳам мақтагандек бўлиб қоламан. Шунчаки битта фикрни айта оламан. У мазкур йўналишдаги энг тажрибали жангчилардан бири эди!

-Жангга Ҳосила Раҳимова қўшиғи остида чиқиб келдингиз. Доимо, мазкур хонанда ижросидаги қўшиқлар орқали чиқиб келишни ният қилганмисиз?
-Тўғриси, Хосила опани ижоди жуда ёқади. Энди доимо, деб айта олмайман. Лекин, ҳар доим ўзбек мусиқаси орқали чиқиб келаман. Юртимиз, миллатимизнинг урф-одатларини тараннум этувчи ашулалар ташриф қоғозим бўлади.


-АҚШ да бир қатор ҳамюртларимиз профессионал бокс, ММА йўналишларида фаолият олиб бормоқда. Уларнинг жангларини кузатиб бораяпсизми ёки танишиб олишга улгурдингизми?
-Барчасини жангларини кузатиб бораман. Фаҳрланаман, дўстларимга тавсия қиламан. Ҳозирда, атрофимдаги барча дўстларим бу ердаги ўзбек спортчиларининг фаолиятига бефарқ эмаслар! Махмуд Мурадовнинг ”Bellator” билан шартнома тузиши бу жуда катта воқейлик. Бу даражага чиқиш осон эмас. Боксчиларимиз, Шоҳжаҳон Эргашев, Фазлиддин Ғоибназаров, мана бир неча кун олдин Шаҳрам Ғиёсов, Муроджон Аҳмадалиевларни жангини кўрдим. Жуда кучли спортчилар. Уларга ҳар доим омад ёр бўлишини тилаб қоламан. Албатта барчаси билан танишиб, яқин муносабатларни йўлга қўяман. Улардан ўрганадиган нарсаларим кўп хали!

-Сизга мухлис бўлиб улгурган ватандошларингизга тилакларингиз?
-Барчасига соғлик тилайман. Оилавий ҳотиржамлик, баҳт ва омад ёр бўлсин! Фаолиятимни кузатиб боринг, албатта ишончингларни оқлайман!

Мухаммад Зиё сухбатлашди

Ҳамюртимиз иштирокидаги жангни томоша қилинг