23 yoshli Yannik Sinner - US Open chempioni!

Erkaklar o'rtasidagi yakkalik musobaqasi bosh sovrini italiyalik 23 yoshli Yannik Sinnerga nasib etdi. Dunyoning birinchi raketkasi hal qiluvchi final uchrashuvida ATP reytingida 12-o'rinni egallab turgan amerikalik Teylor Fritcga qarshi kortga chiqdi va uch set natijasiga ko'ra g'alaba qozondi - 6/3, 6/4, 7/5.

Yannik tennischilarning o'zaro uchrashuvlari hisobida ham oldinga chiqib oldi - 2:1. Ikki soatu 15 daqiqa davom etgan bahsda Cinner 6, Fritc 10 ta eys zarbasini amalga oshirgan. Qo'shxatolar italiyalikda ko'proq bo'ldi - 5 ga 4. Breyklar bo'yicha ustunlik ham tabiiyki, g'olib tennischi tomonida bo'ldi - 6 ga 2. 

Bu Sinner uchun ketma-ket 11-g'alaba bo'ldi. AQSH Ochiq chempionati oldidan u Cincinnati "Masters" turnirida ham chempion bo'lgan edi. U faoliyatidagi ikkinchi "Katta Dubulg'a" turniri chempionligini qo'lga kiritdi. Yannik yil boshida Australian Open musobaqasida ham bosh sovrin sohibiga aylangandi. 

Nyu-York shahridagi muvaffaqiyatli ishtirok Yannik Sinnerga 2000 reyting ochkosi hamda 3 million 600 ming AQSH dollari miqdorida mukofot puli keltirdi.