Abdulla Tangriev pedagogika fanlari bo'yicha falsafa doktori bo'ldi

U pedagogika fanlari bo'yicha falsafa doktori (PhD) dissertaciya ishini muvaffaqiyatli himoya qildi.

Tangriev bugungi kunda O'zbekiston davlat jismoniy tarbiya va sport universitetida oliy toifali trener-o'qituvchi sifatida faoliyat olib bormoqda.

Malumot o'rnida: Tangriev Abdulla Tovoshevich 1981 yil 28 mart kuni Surxandaryo viloyatida ziyolilar oilasida tavallud topgan. Surxondaryo viloyati Boysun tumani 38-sonli o'rta talim maktabiga qabul qilinib, hozirgi Respublika Olimpiya va Paralimpiya sport turlariga tayyorlash markazini tugatgan. Hozirgi kunda O'zbekiston davlat jismoniy tarbiya va sport universiteti “Xalqaro kurash turlari nazariyasi va uslubiyati” kafedrasida o'z ish faoliyatini olib bormoqda.

2021 yilda O'zbekiston davlat jismoniy tarbiya va sport universitetining “Sport faoliyati (faoliyat turlari bo'yicha)” magistratura mutaxassisligini tamomlagan. Tangriev - 1996-2019-yillarda dzyudo sport turi bo'yicha milliy terma jamoa azosi bo'lgan. O'z sport amaliyot davomida 12 karra O'zbekiston chempioni hisoblanadi.

2000 yilda Gongkongda bo'lib o'tgan yoshlar o'rtasidagi Osiyo chempionati g'olibi, 8 marta Osiyo chempionati ishtrokchisi sifatida 1 martta kumush medal, 1 marta bronza hamda 2003-2005-2007-2008-2011-2015- yillarda kattalar o'rtasida Osiyo chempioni. 5 martta Osiyo o'yinlari sovrindori, 4 marta Jahon chempionati sovrindori hamda chempioni hisoblanadi.

To'qqiz marta IJF Grand Slam va Grand-Prix musobaqalari chempioni hamda sovrindori. 5 marta Yozgi universiada o'yinlari chempioni hamda sovrindori. 4 karra Olimpiya o'yinlari ishtrokchisi, 2008 yil Pekin Olimpiadasi kumush medali sohibi.

O'zbekiston Respublikasi Prezidenti tomonidan 2003 yil “SHuhrat" medali, 2007 yil “O'zbekiston Respublikasida xizmat ko'rsatgan sportchi”, 2008 yil “O'zbekiston Iftixori” faxriy unvonlari bilan mukofotlangan.

Hozirgi kunda Abdulla Tangriev dzyudo sport turi bo'yicha oliy toifali trener-o'qituvchi sifatida O'zbekiston, Osiyo hamda Jahon chempionlari va sovrindorlarini tayyorlashda o'z hissasini qo'shib kelmoqda. Oilali, to'rt nafar farzandning otasi.