Abdusattorov kuchli to'rtlikdan joy olgan jahon chempionatida kim g'olib bo'ldi?

Mukofot jamg'armasi 400 000 AQSH dollarini tashkil etuvchi "World Fischer Random Chess Championship 2022" musobaqasida yosh grossmeysterimiz, tezkor shaxmat bo'yicha amaldagi jahon chempioni, Butunjahon shaxmat Olimpiadasi g'olibi Nodirbek Abdusattorov ham muvaffaqiyatli dona surdi. 

Guruhda eng ko'p ochko bilan 1/2 finalga yo'l olgan Nodirbek V kvartetida ikkinchi o'rinni egallagan amerikalik Xikaru Nakamuraga yutqazib qo'ygandi. Uchinchi o'rin uchun kechgan bahsda Nodirbek jahon toji sohibi, norvegiyalik Magnus Karlsenga 1:3 hisobida imkoniyatni boy berdi. Birinchi partiyada Abdusattorov nomdor raqibini mag'lubiyatga uchratgan edi. 

Hal qiluvchi final uchrashuvida FIDE bayrog'i ostida o'ynagan rossiyalik Yan Nepomnyashiy hamda amerikalik Xikaru Nakamura o'zaro to'qnash kelishdi. Asosiy partiyalarda tomonlar 2:2 hisobidagi durangga imzo chekishdi. CHempion nomini aniqlab bergan qo'shimcha armageddon partiyasida oq donalar o'ynagan Nakamura g'alaba qozonib, Fischer Random yo'nalishi bo'yicha jahon chempionligini qo'lga kiritdi. 

Nakamura musobaqa g'olibi sifatida 150 000 AQSH dollari miqdoridagi mukofot puliga ega bo'ldi. Ikkinchi o'rin egasi Yan Nepomnyashiy 85 000, 3-o'rin sohibi Magnus Karlsen 55 000, 4-o'rinni band etgan hamyurtimiz Nodirbek Abdusattorov 40 000 AQSH dollari bilan taqdirlandi.

5-6 o'rin uchun bahs: Uesli So – Vladimir Fedoseev 1-3

7-8 o'rin uchun bahs: Mattias Blubaum – Xyoorvar Gretarsson 3-1

Mukofot pullari taqsimoti:

1. 150,000 2. 85,000 3. 55,000 4. 40,000 5. 25,000 6. 20,000 7. 15,000 8. 10,000