Abu Dhabi Chess Festival 2024. Nodirbek Yakubboev 3-turdan so'ng yuz foizlik natija bilan peshqadam!

Mukofot jamg'armasi 63 600 AQSH dollarini tashkil etuvchi Abu Dhabi Chess Festival 2024 turnirining "Masters" guruhida 11 nafar shaxmatchimiz ham o'z imkoniyatini sinovdan o'tkazyapti.  

Quvonarlisi, ortda qolgan 3-turdan so'ng Nodirbek Yakubboev (2655) yuz foizlik natija bilan musobaqada peshqadamlik qilyapti. Faqat ikki nafar ishtirokchi 3 ta partiyaning barchasida g'alaba qozongan. FIDE bayrog'i ostida o'ynayotgan Volodar Murzin ham Nodirbek singari 3 ochkoga ega. U qo'shimcha ko'rsatkichlarga ko'ra ikkinchi o'rinni egallab turibdi. Bugun 4-turda aynan ikki peshqadam o'zaro dona surishadi. 

Yakubboev 3-turda qora donalarda o'ynashiga qaramay, hindistonlik Harikrishanni mag'lubiyatga uchratdi. Uch imkoniyatdan 2,5 ochko jamg'argan Javohir Sindarov (2674) oq donalarda italiyalik Alberto Barp (2452)dan ustun keldi. 

Xalqaro masterimiz Bahrom Baxrillaev (2344) qora donalarda harakat qilganiga qaramay, reytingda o'zidan yuqorida borayotgan kolumbiyalik grossmeyster Xose Kardoso (2507)ni taslim etdi. Baxrillaev 2,5 ochko bilan qo'shimcha ko'rsatkichlarga ko'ra 11-o'rindan joy olgan. Uchinchi pog'onada borayotgan eronlik grossmeyster Amin Tabatayi (2712) hisobida ham 2,5 ochko bor. Jami 36 nafar shaxmatchi 2,5 ochkodan jamg'argan.  

 "Masters" guruhida qatnashayotgan shaxmatchilarimizdan SHamsiddin Vohidov (2643) ham g'alabaga erishdi. Yosh grossmeysterimiz qora donalarda hindistonlik Ajay Santoshni engdi. Bu turda Ortiq Nig'matov, Abdimalik Abdisalimov va Afruza Hamdamova raqiblari bilan durang o'ynayshdi. Muhiddin Madaminov, Muhammadzohid Suyarov, Saidakbar Saydaliev va Humoyun Begmuratov imkoniyatni boy berishdi.