Abu Dhabi Chess Festival 2024. Nodirbek Yakubboev ishtirokidagi markaziy bahsda durang, Sindarov peshqadamlar safida!

Mukofot jamg'armasi 63 600 AQSH dollarini tashkil etuvchi Abu Dhabi Chess Festival 2024 turnirining "Masters" guruhida 11 nafar shaxmatchimiz ham o'z imkoniyatini sinovdan o'tkazyapti. Ortda qolgan 4-turda peshqadam Nodirbek Yakubboev (2655) FIDE bayrog'i ostida o'ynayotgan Volodar Murzin bilan murosaga keldi. Murzin ham Nodirbek singari 3 ochkoga ega bo'lib turgandi. 

Ikki etakchining ochko yo'qotishidan taqibchilar unumli foydalanib qolishdi. Jumladan, Javohir Sindarov muhim g'alabaga erishib, ochkolarini 3,5 taga etkazdi va qo'shimcha ko'rsatkichlarga ko'ra 9-o'ringa ko'tarilib oldi. Hamyurtimiz oq donalarda harakat qilib, hindistonlik SHrixaridan ustun keldi.     

To'rtinchi turda shaxmatchilarimizdan SHamsiddin Vohidov, Abdumalik Abdusalimov, Ortiq Nig'matov, Muhammadzohid Suyarov, Saidakbar Sayidaliev va Humoyun Begmuratov g'alabaga erishishdi. Bahrom Baxrillaev, Muhiddin Madaminov va Afruza Hamdamova esa raqiblariga imkoniyatni boy berishdi. 

Bugun o'tkaziladigan 5-tur oldidan Nodirbek Yakubboev 3,5 ochko bilan qo'shimcha ko'rsatkichlarga ko'ra 2-o'rinni egallab turibdi. Volodar Murzin 3,5 ochko bilan peshqadamlikni o'z qo'liga oldi. Jami 14 nafar shaxmatchi hisobida 3,5 tadan ochko bor. Abdumalik Abdusalimov, Ortiq Nig'matov va SHamsiddin Vohidov o'z ochkolarini 3 taga etkazib olishdi.