Afruzada ketma-ket to'rtinchi g'alaba, aka-uka jahon chempionlarida ham

8, 10 hamda 12 yoshli shaxmatchilar o'rtasida tashkil etilayotgan jahon chempionatida dunyoning 100ga yaqin mamlakatidan istedodli shaxmatchilar ishtirok etyapti.

Ular orasida hamyurtlarimiz – aka-uka jahon chempionlari Islombek va Javohir Sindarov, Osiyo chempioni Humoyun Bekmurodov, qizlardan Maftuna Bobomurodova, Yuliya Xegay va Afruza Hamdamovalar yurtimiz sharafini himoya qilishyapti.

Sakkiz yoshlilar o'rtasidagi musobaqada imkoniyatini sinab ko'rayotgan Humoyun Bekmurodov 4-turda oq donalarda o'ynashiga qaramay, kanadalik Aleksandr CHang bilan durang qayd etdi.

O'n yoshli shaxmatchilar bahsida birinchi raqam ostida tasniflangan Islombek Sindorov oq donalarda harakat qilib, qozog'istonlik Dias Alimbetovni mag'lub etdi.

O'n ikki yoshli shaxmatchilar musobaqasida ikkinchi tartib raqamli ishtirokchi bo'lgan Javohir Sindorov esa 4-turda rossiyalik Vasiliy Vlovichdan ustun keldi.

Qizlarimizdan Afruza Hamdamova barchani hayratlantirishda davom etyapti. Afruza ketma-ket to'rtinchi g'alabasini qo'lga kiritdi. U reytingda o'zidan yuqorida turgan mo'g'ulistonlik Davaakxuu Unurzulni mag'lubiyatga uchratdi va peshqadamlikni davom ettirmoqda.

Yuliya Xegay polshalik Lena Zarebskaga imkoniyatni boy berib qo'ydi. Maftuna Bobomurodova esa qora donalar o'ynashiga qaramay, qirg'izistonlik Arina Asanovadan ustun ekanligini amalda isbotladi.