Afsonalarning 59-uchrashuvi. Bugun Nadal va Jokovich "Rolan Garros" yarim finali uchun bahs olib boradi

Turnirning chorak finaliga kelib, zamonamizning ikki eng buyuk ikki tennischisi o'zaro to'qnash keladigan bo'ldi. "Rolan Garros" qiroli - Rafael Nadal va sayyoramizning birinchi raketkasi Novak Jokovich yarim final chiptasi uchun o'zaro bahs olib boradi. Har ikki tennischining darajasini tennis muxlislari juda yaxshi bilishadi. SHundan kelib chiqib bugungi bahs turnirning eng qiziqarli va murosasiz uchrashuvi bo'lishi aniq.

Tennischilar bungacha 58 marta to'qnash kelishgan va o'zaro uchrashuvlar natijasi hozircha serbiyalik foydasiga 30-28. Mutaxassislarning fikricha, Nadal ushbu bahsda ustunlikka ega bo'ladi. Albatta grunt qiroliga bu yarashadi. Qo'shimcha qilamizki, Rafael "Rolan Garros" kortlarida 13 bor chempionlikni qo'lga kiritgan. Novak esa amaldagi chempion va o'tgan yili yarim finalda aynan Rafani musobaqadan chiqarib yuborgan edi. Jokovich "Rolan Garros"da ikki marta zafar quchgan. 

Afsonalarning o'zaro 59-bahsida kim g'alaba qozonadi? Buni o'zingiz ko'rib guvohi bo'ling. O'yin bugun Toshken vaqti bilan 23:45 boshlanadi.