Akademik eshkak eshish. Osiyo chempionati qahramonlari bayramona tarzda kutib olindi

Nufuzli musobaqada ishtirok etgan o'zbekistonlik sportchilar umumiy hisobda 7ta oltin, 2ta kumush va 3ta bronza medallarini qo'lga kiritishgandi.

Bugun musobaqada qatnashgan sportchilarimiz yurtimizga qaytib kelishdi. Eshkak eshuvchilarimizni Islom Karimov nomidagi Toshkent xalqaro aeroportida Milliy olimpiya qo'mitasi va O'zbekiston "Rowing and Canoeing" federaciyasi mutasaddilari, muxlislar, sportchilarning ota-onalari hamda ommaviy axborot vositalari xodimlari kutib olishdi.

"Janubiy Koreyada o'tkazilgan musobaqada muvaffaqiyatli ishtirok etdik va yorug' yuz bilan yurtimizga qaytib keldik. Yaratib berilgan sharoitlar uchun muhtaram Prezidentimizga, shuningdek, Milliy olimpiya qo'mitasiga minnatdorchilik bildiraman. Ushbu musobaqa Buenos-Ayresda bo'lib o'tadigan o'smirlar Olimpiya o'yinlariga o'ziga xos tayyorgarlik vazifasini bajardi. Argentinada o'tkaziladigan nufuzli musobaqada ham muvaffaqiyatli ishtirok etishga harakat qilamiz", - dedi musobaqa g'olibi Evgeniy Agafonov.

"Osiyo chempionati biz uchun ajoyib o'tdi. Vatanimizga medallar shodasi bilan qaytganimizdan xursandmiz. Turnir davomida Gonkong, Hindiston vakillari bizga yaxshigina qarshilik ko'rsatishdi. Ammo, biz bo'sh kelmadik va g'oliblikni qo'lga kiritdik. Endi Argentinada o'tkaziladigan Olimpiya o'yinlarida ham fahrli birinchi o'rinni qo'lga kiritmoqchimiz", - dedi Osiyo chempioni Davrjon Davronov.

O'zbekiston Milliy olimpiya qo'mitasi ushbu muvaffaqiyat bilan sportchi va murabbiylarimizni tabriklab qoladi va yaqinlashib kelayotgan Osiyo o'yinlari, shuningdek o'smirlar Olimpiya o'yinlarida ham bundan kam bo'lmagan muvaffaqiyatlarni kutadi.