Andijonda belbog'li kurash bo'yicha xalqaro turnir o'tkazildi

Mazkur musobaqa ko'plab jahon va Osiyo chempionlarini tayyorlagan, sport ustasi, belbog'li kurash bo'yicha jahon chempioni, viloyat belbog'li kurash federaciyasida ijrochi direktori sifatida uzoq yillar faoliyat yuritib, yuzlab shogirdlar tayyorlashga erishgan marhum Mamasoli Ismoilovning yorqin xotirasiga bag'ishlab tashkil etildi. 

Xalqaro turnirda belbog'li kurashchilarimizdan tashqari qo'shni Tojikiston va Qirg'iz Respublikasi davlatlaridan kelgan 200 nafarga yaqin sara polvonlar 8 ta vazn toifasida g'oliblik yo'lida bel olishdi. 

Dastlab xalqaro musobaqanig tantanali ochilish marosimi tashkil etildi. 

Unda so'z olgan Andijon viloyati sport boshqarmasi boshlig'i O'tkirbek Toshpo'latov, O'zbekiston belbog'li kurash federaciyasi raisi Ravshan Dastirov hamda Andijon viloyat belbog'li kurash federaciyasi raisi Rustam To'raxonovlar marhum Mamasoli Ismoilovning hayotlik chog'ida belbog'li kurash sport turini viloyatda rivojlantirish borasida amalga oshirgan ishlari haqida to'xtalib o'tishdi hamda musobaqa ishtirokchilariga omad tilashdi. 

SHundan so'ng turnirga start berildi. Murosasiz va qizg'in tarzda o'tgan bellashuvlarda asosan mezbonlarning qo'li baland keldi. G'olib va sovrindorlar tashkilotchilar tomonidan diplom, medal hamda qimmatbaho esdalik sovg'alari bilan taqdirlanishdi. 

Vazn toifasi bo'yicha g'oliblar:

-57 kg: Kamron Ortiqov (Buloqboshi tumani)

-62 kg: Abdumalik Dilshodbekov (Oltinko'l tumani)

-68 kg: Oybek Sultonov (Asaka tumani) 

-75 kg: Nusratbek Sultonboev (Oltinko'l tumani) 

-82 kg: Husniddin Ro'ziev (Oltinko'l tumani) 

-90 kg: Jasur Isroilov (Oltinko'l tumani) 

-100 kg: Oybek Muhamedov (Farg'ona tumani) 

+100 kg: Azam Anvarjonov (Oltinko'l tumani)

Ilhom RAHMONOV tayyorladi