Argentinadan eksklyuziv. Tarixiy medal sari yo'l

Eslatib o'tamiz, taekvondochimiz Buenos-Ayresdagi Olimpiadada O'zbekiston sport delegaciyasiga dastlabki medalni qo'shib qo'ydi.

«Birinchi jangimni mo'g'ulistonlik raqibga qarshi o'tkazib, 44:3 hisobidagi g'alabaga erishdim. Yarim finalda Janubiy Koreya vakilini 21:10 hisobida mag'lub etdim. Finalda biroz omadim kelmadi va rossiyalik taekvondochiga 8:11 hisobida imkoniyatni boy berdim. Yarim yil oldin Tunisdagi musobaqada ushbu raqibimni 31:28 hisobida mag'lub eta olgandim.

Umuman, jang davomida raqibimdan yomon harakat qilganim yo'q. Faqat, o'zimga bo'lgan ishonch kamlik qildi. Finalni hisobga olmaganda mo'g'ulistonlik sportchiga qarshi jang qiyin kechdi. Ammo, murabbiyim bilan birgalikda unga qarshi to'g'ri taktika tanlay oldik.

O'smirlar Olimpiya o'yinlaridan taassurotlarim bir olam. Yosh taekvondochilar bungacha ushbu o'yinlarda medal qo'lga kiritmagan edilar. SHu sababli ham bu natija men uchun tarixiy ahamiyatga ega. Bundan fahrlanaman. Barchaga rahmat, ayniqsa murabbiyimga minnatdorchilik bildiraman», – dedi Ulug'bek.

Pavel Xan: «Yirik musobaqada sovrindor bo'lish uchun vatanparvarlik talab etiladi»

«Ulug'bek 10 yildan buyon taekvondo bilan shug'ullanadi. Biz o'smirlar Olimpiadasiga qattiq tayyorgarlik ko'rgandik. Bu jarayonida Milliy olimpiya qo'mitasi, O'zbekiston taekvondo WTF associaciyasida bizni qo'llab-quvvatladi. Fursatdan foydalanib, ularga minnatdorchilik bildiraman.

Tayyorgarlik haqida gapiradigan bo'lsam, vazn tashlash lozim bo'lgani uchun bu bizga oson kechmadi.
Ulug'bek o'yinlarga licenziyani 7 oy avval qo'lga kiritgandi. Bu vaqt ichida uning bo'yi 5 sm ga o'sdi. SHu sababli ham qiyin bo'ldi. Bunday saviyadagi musobaqalarda sovrindor bo'lish uchun qattiq mehnat qilish lozim. Maqsad sari olg'a intilish va albatta vatanparvar bo'lish kerak».

Rashitovning ishtiroki tahlili

«Har bir musobaqadan so'ng biz tahlil qilamiz. Bu safargi ishtirok haqida gapiradigan bo'lsam, unda ruxiy tayyorgarlik bo'yicha kamchiliklar ko'zga tashlandi. Ulug'bek ko'proq musobaqalarda ishtirok etib, o'ziga bo'lgan ishonchni oshirishi lozim».