Australian Open. Dunyoning birinchi raketkasi chempionlik himoyasini davom ettirmoqda

Dunyoning birinchi raketkasi, musobaqaning amaldagi chempioni Yannik Sinner chorak final yo'llanmasini qo'lga kiritdi. Italiyalik tennischi to'rtinchi bosqichda ATP reytingida 13-pog'onada borayotgan daniyalik Xolger Runeni to'rt set natijasiga ko'ra mag'lubiyatga uchratdi - 6/3, 3/6, 6/3, 6/2.

Bu bilan Sinner tennischilarning o'zaro uchrashuvlari hisobida oldinga chiqib ham oldi - 3:2. Uch soatu besh daqiqa davom etgan bahsda Sinner 14, Rune 5 ta eys zarbasini amalga oshirgan. Yannik faoliyatida 10-marotaba "Katta Dubulg'a" turnirlarining 1/4 finalchisiga aylandi. Endi u yarim final chiptasi uchun Aleks De Minaurga qarshi kortga chiqadi. Avstraliyalik tennischi 1/8 finalda amerikalik Aleks Mikelsendan 6/0, 7/6(5), 6/3 hisobida ustun keldi.