Ayollar o'rtasidagi blic bahslarida Afruza Hamdamova 8-turgacha zo'r o'ynadi

Ayollar o'rtasidagi jahon chempionatida qatnashgan yagona vakilamiz Afruza Hamdamova rapid bahslarida shov-shuvli natija qayd etgandi. Afruza bir necha jahon chempionlarini mag'lubiyatga uchratib, yakunda chempiondan bor yo'g'i yarim ochko kam, kuchli uchlikdan joy olgan Ju Ven Jun (Xitoy, 2536) va Katerina Lagno (FIDE, 2433) bilan esa bir xilda ochko jamg'arib, sovrinli o'rinlardan chetda qolgandi. 

Hamdamova 11 ta turdan iborat blic bahslarida ham yomon qatnashmadi. Ayniqsa, dastlabki 7 ta turda mag'lubiyatga uchramadi. U 1-turda aynan blic bo'yicha ikki karra jahon chempioni qozog'istonlik Bibisara Assaubaeva bilan uchrashuvda muqarrar mag'lubiyatdan chiqib ketib, durangga imzo chekdi. Keyin Deys Korini mag'lubiyatga uchratdi. Rossiyalik jahon chempioni Valentina Gunina hamda amerikalik Alise Li bilan durang o'ynadi. Gruziyalik Lela Javaxishvili va xitoylik grossmeyster Jon Yi Tanni taslim eta oldi. Ettinchi turda germaniyalik Dinara Vagner bilan murosaga keldi. Oxirgi 4 ta turda biroz charchab qoldi chog'i, 3 ta mag'lubiyat qabul qilib oldi. Aynan shu mag'lubiyatlar uning Top-8`talikka kirishiga to'sqinlik qildi. 

SHunga qaramay, jahon chempionatida qatnashgan yagona vakilamiz rapid bahslaridagi muvaffaqiyatli ishtiroki bois, dunyoning Top-20`talik reytingiga kirib olishga erishdi. AQSH sharafini himoya qilayotgan hamyurtimiz Gulruhbegim Tohirjonova esa blic jahon chempionatida 99-o'rin bilan kifoyalandi.