Azamat Abduraimov istefoga chiqdi

2018 yil mart oyida ushbu terma jamoaga bosh murabbiy etib tayinlangan Azamat Birodarovich o'z arizasiga ko'ra ishdan bo'shadi. Buni murabbiyning o'zi ham tasdiqladi. 

Eslatib o'tamiz, Abduraimov boshchiligidagi O'zbekiston o'smirlar terma jamoasi Osiyo chempionati final bosqichiga yo'llanmani qo'lga kiritgan edi. Yaqindagina terma jamoa Belarus poytaxtida o'tgan Rivojlanish kubogida ishtrok etib 8ta jamoa orasida 8-o'rinni egallagan edi. 

Ushbu qaror sababini bilish uchun murabbiy bilan bog'landik.

"Ha, bu haqiqat. Bugun ketish haqida ariza yozdim. Qaror o'zimniki. Uni muhokama qilishni istamayman. Bu terma jamoa bilan 2 yil halol mehnat qildim, Osiyo chempionati finaliga chiqdik. O'tgan yili jamoani tozaladik va hozir unda birorta yoshi katta yoki tanish bilish orqali kelgan futbolchi yo'q. Futbolni tanish-bilishchilik bilan o'ynashmaydi, afsonaviy futbolchining o'g'li sifatida buni yaxshi bilaman. Hammasiga o'zim erishganman. Otamning familiyasi tufayli ikki baravar qiyin bo'lgan.

Bu terma jamoaga ko'p kuch va mehnatimni sarfladim. Irodali jamoa tuza oldim. Yosh o'yinchilarga ajoyib futbolchi bo'lib etishishni, yangi murabbiylar shtabiga esa jahon chempionatiga chiqish vazifasini bajarishni tilayman" - dedi Azamat Abduraimov.