Aziz Abduhakimov: Musobaqalarda tanish-bilishchilikka chek qo'yish uchun onlayn platforma yaratiladi

Prezident juma kuni Parij Olimpiadasiga hozirdan tayyorgarlik ko'rish kerakligini aytib, eng muhim vazifalarni belgilab berdi, dedi bosh vazir o'rinbosari, turizm va sport vaziri Aziz Abduhakimov «Gazeta.uz » muxbiri bilan suhbatda.

«Musobaqalarda tanish-bilishchilikka chek qo'yish bo'yicha aniq topshiriq berildi. Yani tegishli onlayn platforma yaratiladi. Aynan pastdan turli musobaqalarda yaxshi natijalarni ko'rsatgan sportchilar viloyat va respublika bosqichida qatnashadigan tizim ishlab chiqiladi», — dedi vazir.

Uning so'zlariga ko'ra, platforma orqali istalgan fuqaro musobaqalar qanday tashkil etilayotganini ko'ra oladi. «Endi biz musobaqalarda kim qatnashayapti, oldin qanaqa natijalarga ega bo'lgan, nimaga kuchli sportchilar ishtirok etmayapti, degan savollarga javob topa olamiz», — dedi u.