Badiiy gimnastikachilarimizdan navbatdagi medallar shodasi

Qita birinchiligida gimnastikachi qizlarimiz bugun ham O'zbekiston g'aznasiga yana uchta oltin, bitta kumush va ikkita bronza medalini qo'shib qo'yishdi.

Taxmina Ikromova ko'pkurash bahslarida raqibalariga hech qanday imkoniyat qoldirmagan holda chempionlikni qo'lga kiritgan bo'lsa, guruh mashqlarida qizlarimiz oltin medalga ega chiqishdi. SHuningdek, halqa bilan yakuniy chiqishda oltin medalga sazovor bo'lgan Natalya Usova bugungi kun qahramoniga aylandi.

Bundan tashqari, SHaxzoda Ibragimova, Nargiza Jumaniyozova, Nilufar Azamova, Mumtoza Isxoqzoda, Xurshida Abduraufova va Mariya Pak 5 ta halqa bilan mashq bajarish bahsida kumush medalni qo'lga kiritdi. O'smirlar o'rtasidagi finalda Anastasiya Saranceva to'p bilan bajarilgan mashqda shohsupaning uchinchi pog'onasidan joy olgan bo'lsa, guruh mashqlarida Domenika Damirova, Irodaxon Sadikova, Diyora Baxtiyorova, Mubina Kamolova, Yasmin Amira Mirzayarova 5 ta lenta bilan mashq bajarishda bronza medaliga sazovor bo'lishdi.