Bahodir polvon Bekchanov xonadoniga tashrif

Bu inson vaqtida erkin kurash, yunon-rum kurashi, sambo hamda kurash bilan shug'ullanib, qator yutuqlarni qo'lga kiritgan edi. Keyingi paytlarda murabbiy sifatida vohalik yosh sportchilarni etuklik sari etaklab, ular orasidan taniqli kurashchilar etishib chiqishiga munosib ulushini qo'shdi. 

Ko'plab O'zbekiston va xalqaro miqyosidagi musobaqalarda hakamlik qildi. Albatta, fidoiy insonning beminnat mehnatlari beetibor qolmadi. O'zbekistonda xizmat ko'rsatgan sport ustozi unvoniga, “El-yurt hurmati” ordeniga sazovor bo'ldi. Ayni damda, u nafaqada.

Yaqinda sportimiz jonkuyari O'zbekiston Respublikasi jismoniy tarbiya va sport vazirligi tomonidan “Jismoniy tarbiya va sport alochisi” ko'krak nishoni bilan taqdirlandi. Albatta, bu ham B.Bekchanovning sport sohasidagi, uni rivoji yo'lidagi ko'p yillik samarali xizmatlari evaziga berilgan munosib rag'bat edi.

Kuni kecha Xorazm viloyati jismoniy tarbiya va sport boshqarmasi boshlig'i  SH.Madaminov, Urganch ixtisoslashtirilgan olimpiya zaxiralari maktab-internati direktori I.Otaev, O'zbekiston talabalar sporti associaciyasi viloyat mintaqaviy bo'limi raisi o'rinbosari M.Qalandarov va  sport federaciyalar  hamkorligida xayrli ishga qo'l urishdi. Bahodir polvon Bekchanovning uyiga tashrif buyurib, uning holidan xabar olindi. Bu galgi tashrif chog'ida sportimizning ezozli faxriysiga hurmat va ehtirom ramzi sifatida viloyat jismoniy tarbiya va sport boshqarmasining faxriy yorlig'i topshirildi. 

Fursatdan foydalanib, dilkash inson bilan dildan suhbat qurildi,  ustoz asos solgan uy muzeyiga qo'yilgan  eksponatlar, surat, medal va boshqa turdagi kollekciyalarni tomosha qilishdi. Asosiysi, bu tashrifdan Bahodir polvonning quvonchi ko'klarga etdi. 

Ikrom XUDOYBERGANOV, Urganch shahridan