Barcha turdagi sport tadbirlari va yig'inlar ham vaqtincha to'xtatildi

Bunda O'zbekiston Respublikasi Sog'liqni saqlash vazirligi huzuridagi Sanitariya-epidemiologik osoyishtalik agentligi tomonidan gripp va koronavirus infekciyasi profilaktikasi bo'yicha ishlab chiqilgan tavsiyalar inobatga olingan.

Buyruqqa ko'ra, vazirlik tizimidagi barcha sport maktablari, ixtisoslashtirilgan maktab-internatlari, futbol akademiyalari, respublika oliy sport mahorati maktablari, oliy talim muassasalari, malaka oshirish va qayta tayyorlash markazlarida o'quv hamda o'quv-mashg'ulot jarayonlari, to'garaklar faoliyati, shuningdek, barcha turdagi sport tadbirlari, yig'inlar o'tkazilishi ham joriy yil 16 martdan boshlab vaqtincha to'xtatildi.

SHuningdek, Qoraqalpog'iston Respublikasi, viloyatlar va Toshkent shahrida yangi qurilgan hamda “Navro'z” umumxalq bayrami kunlarida foydalanishga topshirish rejalashtirilgan sport obektlarining tantanali ochilish marosimlarini o'tkazish ham keyinroqqa qoldiriladi.

Vazirlik tizimidagi ixtisoslashtirilgan olimpiya zaxiralari maktab-internatlari, olimpiya va milliy sport turlari bo'yicha davlat ixtisoslashtirilgan maktab-internatlari, hududiy bolalar va o'smirlar futbol akademiyalari hamda O'zbekiston davlat jismoniy tarbiya va sport universiteti va uning Nukus filialida o'quv jarayonlari va sport mashg'ulotlari o'tkazilishi rasmiy ko'rsatma berilgunga qadar vaqtincha to'xtatilib, o'quvchilar tatilga chiqarildi.

Jismoniy tarbiya va sport bo'yicha mutaxassislarni ilmiy-metodik taminlash, qayta tayyorlash va malakasini oshirish markazi va uning Nukus, Samarqand hamda Farg'ona filiallarida barcha turdagi malaka oshirish va qayta tayyorlash kurslari, shu jumladan pullik xizmat ko'rsatish turlari vaqtinchalik to'xtatildi.

Qolaversa, buyruq bilan markaz va uning filiallari mehnat jamoasi o'rtasida COVID-19 koronavirusi yuzasidan tushuntirish ishlarini olib borish, malaka oshirish va qayta tayyorlash kurslari tinglovchilarini masofaviy o'qitish choralarini ko'rish vazifasi belgilandi.

Bundan tashqari, bolalar-o'smirlar sport maktablari, ixtisoslashtirilgan bolalar-o'smirlar sport maktablari, Respublika oliy sport mahorat maktablari hamda sport mashg'ulotlari o'tkaziladigan barcha turdagi boshqa muassasalarda sport sekciyalari va to'garaklari faoliyati vaqtinchalik to'xtatilib, shug'ullanuvchilarning ota-onalari sport sekciyalarining faoliyati nomuayyan muddatga to'xtatilganligi to'g'risida ogohlantirildi.

Koronavirus sababli mehnat jamoasi o'rtasida vahimaga olib keluvchi yolg'on xabarlar, videomateriallar va boshqa noto'g'ri malumotlarni tarqatmaslik ham belgilandi.

Sport va jismoniy tarbiya tadbirlari kalendar rejasiga kiritilgan barcha sport musobaqalari, o'quv-mashg'ulot yig'inlari hamda xalqaro va respublika seminarlari viloyat, tuman (shahar)larda to'xtatilib, bu jarayonlar qatiy nazoratga olinadi.