Bilasizmi? CHim ustida xokkey jamoamiz jahon reytingida 12-o'ringacha ko'tarilgan

O'zbekiston Milliy olimpiya qo'mitasi raisi Rustam SHoabdurahmonov ushbu sport bo'yicha O'zbekiston terma jamoasining rejalari bilan tanishdi. ZOOM platformasida o'tgan tadbirda O'zbekiston sport faxriylari kengashi raisi Bahodir Maxistov, Sport o'yinlari bo'yicha Respublika oliy sport mahorat maktabi direktori Jasur Akramov, MOQ hamda O'zbekiston chim ustida xokkey federaciyasi mutasaddilari, terma jamoa murabbiylari ishtirok etishdi.

Jamoa rejalari bilan ayni paytda Andijondagi yig'inda bo'lib turgan murabbiy Rinat Ahmadulin tanishtirib o'tdi. Uning bergan malumotiga ko'ra, 2018 yil erkaklar jamoamiz jahon reytingida 12-pog'onagacha ko'tarila olgan. Hozir esa 55-o'rinda turibdi. Murabbiy tayyorgarlik doirasida Pokiston va Hindiston kabi Osiyodagi kuchli jamoalar bilan qo'shma yig'inda ishtirok etish rejalashtirilayotganini takidladi. O'z navbatida MOQ raisi ushbu sportni yurtimizda yanada ommalashtirish bo'yicha fikrlarini bildirib o'tdi.

“Hukumatimizning qo'llab-quvvatlashi bilan Yashnobod tumanida chim ustida xokkeyga ixtisoslashgan maydon qurilmoqda. Nasib qilsa, uni zamonaviy inventarlar bilan jihozlab, jamoamizni yirik musobaqalarda ishtirok etishini taminlaymiz. O'z navbatida, murabbiylarimizdan karantin talablariga rioya qilgan holda o'quv-mashg'ulot yig'inlarini davom ettirishlarini so'rab qolamiz. SHuningdek, selekciya ishlariga ham alohida ahamiyat qaratish zarur. Murabbiylarimiz Pokiston va Hindiston maktablarining kuchli metodikasini o'rganishsin. Bu sportda bizning ham o'z maktabimiz bor. Endi uni hozirgi zamonga moslashtirib olishimiz kerak”, – dedi MOQ raisi.

Suhbat davomida Rinat Ahmadulin poytaxtimizda chim ustida xokkey bilan shug'ullanadigan hech bir havaskorlar klubi yoki jamoasi yo'qligini takidladi. MOQ raisi ushbu sportni aholi va yoshlar orasida ommalashtirish uchun turli musobaqalar o'tkazish zarurligini takidladi. Buning birinchi namunasi sifatida “Navro'z” bayrami arafasidanoq turli tadbirlar o'tkazish bo'yicha ko'rsatma berildi.