"Birgalikda g'alaba qozonamiz". Aleksandr SHerbina muxlislarga murojaat qildi

Ushbu muhim o'yin oldidan toshkentliklar jamoasi sardori muxlislarga murojaat qildi. 

"Hurmatli muxlislar! 

Butun mavsum davomida bizni to'xtovsiz tarzda qo'llab-quvvatladingiz va bu orqali g'alabalarimizga yordam berdingiz. Siz bizning oltinchi o'yinchimiz bo'lib, qiyin pallalarda ko'mak berdingiz.

Ayni paytda oldimizda mavsumning eng muhim o'yinlari turibdi. "Toros" jamoasi VXLda ko'p bor g'olib bo'lgan. Ammo, biz ortimizda butun Toshkent, butun O'zbekiston turganini his qilib turibmiz. 

Biz faqat g'alaba uchun harakat qilamiz va ishonchimiz komilki, pley-off o'yinlarida bizni qo'llab-quvvatlaysiz. Sizlarni 26-27 fevral kunlari "Humo Arena"da kutamiz. Birgalikda g'olib bo'lamiz".

Eslatib o'tamiz, "Humo" hamda "Toros" qarama qarshiligidan so'ng jamoamiz 0:2 hisobida ortda bormoqda. Oldinda turgan o'yinlarda g'alaba "Humo" uchun suv va havodek zarur. SHunday ekan, jamoamizni arenada bevosita qo'llab-quvvatlang!