Bugun 105 000 dollar mukofot jamg'armasiga ega UzChess Cup turniri boshlanadi

Ikkinchi bor tashkil etilayotgan UzChess Cup turnirining umumiy mukofot jamg'armasi 105 000 AQSH dollaridan iborat bo'lib, Masters, Challengers va Futures guruhlarida o'tkaziladi. Kuchlilar jam bo'lgan Masters guruhida rossiyalik jahon chempioni Yan Nepomnyashiy, hindistonlik taniqli grossmeysterlar Aravindh CHitambaram, Rameshbabu Pragnanandha, Arjun Ergaisi, eronlik Parham Maqsudlu, o'zimizning qorako'z grossmeysterlar Nodirbek Abdusattorov, Javohir Sindarov, Nodirbek Yakubboev va SHamsiddin Vohidov chempionlik hamda sovrinli o'rinlar uchun bahs olib boradi.      

FIDE Circiut uchun qimmatli reyting ochkolari o'ynaladigan ushbu xalqaro turnirga qura tashlanib, 9 tur uchun barcha juftliklar malum bo'ldi. Bugun soat 14:30 da boshlanadigan 1-tur uchrashuvida o'zbek derbisiga guvoh bo'lamiz. Nodirbek Abdusattorov oq donalarda SHamsiddin Vohidovga qarshi bahs olib boradi. Javohir Sindarov esa qora donalarda Yan Nepomnyashiy bilan hisob-kitob qiladi. 

Turnirning Challengers guruhida Gulruhbegim Tohirjonova ham ishtirok etadi. U o'ziga xos o'zbek derbisida Jahongir Vohidovga qarshi oq donalarda o'ynaydi. Bu guruhda hamyurtlarimizdan Muhiddin Madaminov va Muhammadzohid Suyarov ham bor.