Bugun Dubayda Nodirbek Abdusattorov va Javohir Sindarov ishtirokidagi turnir boshlanadi

Musobaqada jahonning etakchi shaxmatchilari turli jamoalar tarkibida o'yinlar o'tkazishadi. 

Avval xabar berganimizdek, ushbu nufuzli musobaqada hamyurtlarimiz Nodirbek Abdusattorov v Javohir Sindarov ham ishtirok etadi. Bahslar rapid yo'nalishida jamoaviy tarzda tashkil etiladi. Global Chess League ikki davrali turnir bo'lib, unda 6 ta jamoa bosh sovrin uchun kurash olib boradi.  

Nodirbek Abdusattorov "Balan Alaskan Knights", Javohir Sindarov esa "UpGrad Mumba Masters" jamoasi tarkibida o'yinlar o'tkazishadi. 

Bugun 1-tur doirasida Javohir Sindarov "UpGrad Mumba Masters" tarkibida "Triveni Continental Kings" bilan bellashadi. Javohir o'z o'yinini daniyalik Yonas Bal Berrega qarshi o'tkazadi. 

Nodirbek Abdusattorov o'ynayotgan "Balan Alaskan Knights" esa musobaqani ertaga, 23 iyun kuni "SG Alpine Warriors"ga qarshi boshlaydi. Nodirbek mazkur qarama-qarshilikda 2-stolda hindistonlik Gukeshga qarshi o'ynaydi. 

Ertaga shuningdek 2-turda har ikki hamyurtimizning jamoalari o'zaro to'qnash keladi. Unda Abdusattorovga rossiyalik Aleksandr Grishuk raqib bo'ladi. Sindarov esa hindistonlik Raunak Sadvani bilan o'zaro hisob-kitob qiladi.