Bugun Nodirbek va Javohir yulduzlar ishtirokidagi "Freestyle Chess Grand Slam"dagi yurishini boshlaydi

Dunyoning ko'zga ko'ringan grossmeysterlari qatnashadigan musobaqada ikki shaxmatchimiz - Nodirbek Abdusattorov va Javohir Sindarov ham o'z mahoratini namoyish qiladi. Sindarov musobaqada qatnashishdan bosh tortgan hindistonlik afsona Vishvanatan Anandning o'rnini egallagan. Javohir saralash turniri finaliga qadar etib borib, Vladimir Fedoseevga 2:3 hisobida yutqazgandi. 

17 fevralga qadar davom etadigan turnir aylana tizimda o'tkaziladi va unda bir shaxmatchi qolgan hamma ishtirokchilar bilan rapid formatida o'zaro bahs olib boradi. Kuchli sakkiztalikdan joy olgan shaxmatchilar pley-off bosqichiga yo'l oladi. 

Bu bosqichda har bir match ikki klassik partiyadan iborat bo'ladi. Agar ikki uchrashuv natijasiga ko'ra hisob teng bo'lib qolsa, g'olib tay-brekda aniqlanadi. Vaqt nazorati 90 daqiqa bo'lib, keyin har bir yurishga 30 soniyadan qo'shib boriladi. 

Turnir ishtirokchilari: Magnus Karlsen (Norvegiya, 2833), Fabiano Karuana (AQSH, 2803), Xikaru Nakamura (AQSH, 2802), Dommaradju Gukesh (Hindiston, 2777), Nodirbek Abdusattorov (O'zbekiston, 2766), Alireza Firuzdja (Franciya, 2760), Levon Aronyan (AQSH, 2745), Vinsent Kaymer ( Germaniya,2731), Vladimir Fedoseev (Sloveniya, 2724), Javohir Sindarov (O'zbekiston, 2700).