Bugun Qosimjonov amaldagi jahon chempioni - Magnus Karlsenga qarshi dona suradi

Musobaqada amaldagi jahon chempioni norvegiyalik Magnus Karlsen, jahon vice-chempionlari Vishvanatan Anand (Hindiston), Fabion Karuana  (AQSH), Sergey Karyakin (Rossiya) kabi mashhur shaxmatchilar dona surishyapti. 

Mukofot jamg'armasi 433 000 AQSH dollarini tashkil etuvchi Grand Swiss turnirida O'zbekiston sharafini 17-jahon chempioni Rustam Qosimjonov hamda 15 yoshli xalqaro grossmeysterimiz Nodirbek Abdusattarov himoya qilmoqda. Qosimjonov 2657, Abdusattarov esa 2608 reyting ochkosiga ega. 

Etiborga molik jihati shundaki, bugun musobaqaning 3-turida Rustam Qosimjonov amaldagi jahon chempioni, norvegiyalik Magnus Karlsenga qarshi dona suradi. Ushbu bahsda Qosimjonov qora donalarda harakat qiladi. Har ikki jahon chempioni 2 imkoniyatdan 1,5 ochko jamg'arishgan. 

Nodirbek Abdusattorov esa bugun qora donalarda rossiyalik xalqaro grossmeyster Vladimir Fedoseevga qarshi bahs olib boradi. Turnirda 106-raqamda saralangan Nodirbek 2-turdan so'ng turnir jadvalida 1,5 ochko bilan qo'shimcha ko'rsatkichlarga ko'ra 16-o'rinni egallab turibdi. Oltinchi pog'onadagi rossiyalik grossmeyster Aleksey Saranada ham 1,5 ochko bor.

Malumot uchun, 22 oktyabr kuni yakuniga etadigan Grand Swiss turniri g'olibi 70 000, ikkinchi o'rin sohibi 50 000, uchinchi o'rin egasi esa 40 000 AQSH dollari miqdoridagi mukofot puliga ega bo'ladi. Kuchli o'ttizlikka kira olgan shaxmatchiga esa 2000 AQSH dollari taqdim etiladi.