Bugun Toshkentda shaxmat yulduzlari ishtirokida superturnir boshlanadi FOTO + JUFTLIKLAR

Mukofot jamg'armasi 166 000 AQSH dollarini tashkil etuvchi "Uzchess Cup" turniri Samarqand mezbonlik qilgan jahon chempionatini inobatga olmaganda, yurtimizda o'tkazilayotgan eng katta masshtabdagi musobaqa hisoblanadi. 

Turnir 3 guruhda o'tkaziladi:

"Masters" guruhida reytingi 2700 va undan yuqori shaxmatchilar;

"Challengers" guruhida reytingi 2600 va undan yuqori shaxmatchilar;

"Futures" guruhida reytingi 2500 va undan yuqori shaxmatchilar ishtirok etishadi.

Kecha "Uzchess Cup" turniriga qura tashlash marosimi bo'lib o'tdi. Dunyoning nomdor grossmeysterlari jam bo'lgan "Masters" guruhida hamyurtlarimizdan Nodirbek Abdusattorov, Javohir Sindarov, Nodirbek Yakubboev bosh sovrin uchun bahs olib borishadi. SHuningdek, ushbu kuchlilar guruhidan Vidit Santosh Gujrathi (Hindiston), Parham Maqsudlu (Eron) SHahriyar Mamedyarov (Ozarbayjon), Aleksandr Grishuk (FIDE), YU Yang Yi (Xitoy), Richard Rapport (Ruminiya) va Aleksey Sarana (Seriya) joy olgan.

Qura natijasiga ko'ra, "Masters" guruhining 1-turida Nodirbek Abdusattorov oq donalarda Parham Maqsudluga qarshi bahs olib boradi. Javohir Sindarov va Nodirbek Yakubboev qora donalarada mos ravishda YU Yang Yi hamda Richchard Rapport bilan hisob-kitob qiladi. 

"Challengers" guruhida shaxmatchilarimizdan Jahongir va SHamsiddin Vohidovlarga muxlislik qilamiz. Jahongir 1-turda oq donalarda turkiyalik Mustafa Yilmazga, SHamsiddin esa qora donalarda germaniyalik Aleksandr Donchenkoga qarshi bahs olib boradi.  

"Futures" guruhida o'zbekistonlik shaxmatchilar Muhammadzoxid Suyarov, Muhiddin Madaminov va Humoyun Begmuratov nomdor raqiblariga qarshi dona surishadi. Qura natijasiga ko'ra, 1-turda Suyarov - Madaminov qarama-qarshiligiga guvoh bo'lamiz. Humoyun esa qora donalarda ukrainalik Vitaliy Bernardski bilan to'qnash keladi.  

Vaqt nazorati: Klassik. Har bir o'yin boshida o'yinchilarga 40 ta yurish uchun 90 daqiqa, 41-yurishdan o'yin oxirigacha esa qo'shimcha 30 daqiqa beriladi va har bir yurish uchun 30 soniya vaqt qo'shib boriladi.