“Bunyodkor”ning bolalari Xorvatiya futbol maydonlarida

Iqtidorli yoshlar makoni bo'lgan “qaldirg'ochlar” jamoasini o'zbek futbolining kelajagi desak, mubolag'a emas.

Futbol jamoatchiligi ko'z o'ngida “Bunyodkor” hamisha yuksaklikka intiluvchi, yangi-yangi g'oyalarni hayotga tatbiq etuvchi futbol klubi sifatida gavdalanadi...

Aytish joiz, joriy yil iyun oyining birinchi o'n kunligi “Bunyodkor” futbol klubi tarixiga zarhal harflar bilan yozib qo'yiladigan bo'ldi. Klubning 70 nafarga yaqin yosh futbolchilari ilk bor Xorvatiyaga safar uyushtirdi. Akademiyaning uch jamoasi (U-11, U-13 va U-14) yozning birinchi haftasida bu go'zal mamlakatda ananaviy tarzda o'tkazib kelinayotgan “Dalmatinko Cup” musobaqasida Evropa futbol akademiyalarida tahsil olayotgan tengqurlari bilan kuch sinashdi. 

Har yili ananaviy tarzda o'tadigan musobaqaning bu galgisida 13 mamlakatdan 200ga yaqin jamoa, 3500 nafardan ortiq yosh futbolchilar qatnashdi. O'zbek futbolining yosh qaldirg'ochlari Xorvatiya, Sloveniya, Makedoniya, Ukraina, Qozog'iston, Kosovo, Vengriya, Albaniya, CHexiya, Bosniya va Gercegovina kabi davlatlarning jamoalari bilan bahslashdi.

“Bunyodkor-2008” (U-14) va “Bunyodkor-2009” (U-13) jamoalari saralashlarni omadli tarzda o'tkazgan holda chorak finalgacha etib kelishdi. Miraziz Mirzaahmedov murabbiyligidagi “Bunyodkor-2008” guruhda uch g'alaba va bir durangga erishdi. Jumladan, Xorvatiyada eng kuchli akademiyalardan bo'lgan “Xayduk” (Split) jamoasini 1:0 hisobida engdi. Ammo 1/4 finalda “Primorac” klubiga qarshi ikki bor hisobda oldinda borishiga qaramay, yakunda 2:2 hisobi qayd etildi. Penaltilar seriyasida imkoniyatni boy berdi-2:4.

Alisher Ibrohimov etakchiligidagi “Bunyodkor-2009” guruh bosqichidan so'ng chorak finalda mamlakatning eng kuchli, dunyoda oltinchi, Evropada esa uchinchi o'rinda turuvchi “Dinamo” (Zagreb) futbol akademiyasi vakillari ro'baro' keldi. Nomdor raqib bilan yosh futbolchilarimiz tengma-teng kurash olib bordi. Uchrashuvda hisob ochilmadi. Penaltilar seriyasida mezbonlar ustun keldi – 7:8.

G'ulom Xalimtoev shogirdlari bo'lgan “Bunyodkor-2011”ga esa omad ko'proq kulib boqdi. Ular faqat finalda Sloveniyaning “Domjale” jamoasidan mag'lub bo'ldi. Xalqaro musobaqada ilk bor qatnashgan holda 2-o'rinni egallash har qanday jamoa uchun muvaffaqiyatli sanaladi. SHu jihatdan 2011 yilda tavallud topgan yosh charm tup ustalarining Xorvatiyadagi o'yinlarini ijobiy baholash lozim. 

Evropa futbol maydonlarida tup surgan bolajonlar uchun eng esda qolarli yana bir voqea 6 iyun kuni yuz berdi. UEFA Millatlar ligasi turniri doirasida shu kuni Split shahridagi “Polyud” stadionida so'nggi jahon chempionatining finalchilari – Xorvatiya va Franciya milliy terma jamoalari o'zaro bahslashdi. Jahon futbolining etakchilari ishtirokidagi o'yinni bolajonlarimiz bevosita stadiondan tomosha qilishdi. Bu ularga katta zavq, olam-olam taassurotlar, unutilmas lahzalar tuhfa etgani shubhasiz.

Turnir davomida akademiyalar o'rtasida ikki tomonlama hamkorlik aloqalarini yanada rivojlantirish, o'quv-yig'inlar, o'rtoqlik uchrashuvlari tashkil etish borasida kelishuvlarga erishildi.

SHuningdek, safar davomida “Bunyodkor”ning bir guruh mutaxassislari Zagrebda “Dinamo” klubi infratuzilmasi, faoliyati, ish yuritish tartibi, o'ziga xos xususiyatlari bilan yaqindan tanishdi. “Dinamo” FK rahbariyati bilan har yili “Bunyodkor”ning 4-5 nafar iqtidorli futbolchilari Zagrebda bo'ladigan ko'rik mashg'ulotlarida qatnashishi bo'yicha kelishib olishdi.

T. Ro'ziev, O'zA.