Butunjahon shaxmat Olimpiadasi yakunlariga bag'ishlangan matbuot anjumani o'tkazildi

Hamyurtlarimiz musobaqada to'qqiz tur yakuniga ko'ra eng ko'p ochko jamg'arib, oltin medalga ega chiqdilar. Musobaqa davomida Rossiya,  Hindiston, Eron, Ukraina, Vengriya, Polsha, Moldova, Xitoy terma jamoalari mag'lub etildi. SHaxmat Olimpiadasida yurtimiz sharafini Nodirbek Yoqubboev, Nodirbek Abdusattorov, Javohir Sindarov, SHamsiddin Vohidov va Sitora Saparova himoya qildi. Ular bahslarda murabbiy Saydali Yo'ldoshev boshchiligida dona surishdi.

Bugun, 5 dekabr kuni O'zbekiston shaxmat federaciyasida ortda qolgan musobaqa yakunlariga bag'ishlangan matbuot anjumani bo'lib o'tdi. Anjumanda Butunjahon shaxmat Olimpiadasi qahramonlari, O'zbekiston shaxmat federaciyasi mutasaddilari, yosh aql-idrok sohiblari, ommaviy axborot vositalari xodimlari va boshqalar ishtirok etishdi.

Tadbir davomida O'zbekiston shaxmat federaciyasi raisi o'rinbosari Husan Turdaliev yakunlangan musobaqa haqida gapirdi.

"Bir necha kun oldin Turkiyada yakunlangan Butunjahon shaxmat Olimpiadasida o'smirlarimiz katta g'alabani qayd etishdi. Bu biz uchun, umuman o'zbek sporti, o'zbek shaxmat oilasi uchun juda katta yutuqdir. Mazkur Olimpiadada eng yaxshi natijamiz 2004 yilda qayd etilgan bo'lib, o'shanda hamyurtlarimiz uchinchi o'rinni qo'lga kiritgandilar. Bu safar esa tarixda ilk marotaba shaxmatchilarimiz oltin medalga sazovor bo'ldilar. Biz bundan juda xursandmiz. Jamoa o'z oldiga qo'yilgan vazifani alo darajada bajardi. Ishonchim komil, yoshlarimiz bu bilan to'xtab qolishmaydi", - dedi Husan Turdaliev.

SHundan so'ng ommaviy axborot vositalari xodimlari o'zlarini qiziqtirgan savollar bilan murojaat qildilar. Anjumanda federaciya mutasaddilari yaqin orada o'tkaziladigan musobaqalar, federaciyaning rejasi haqida malumot berishdi.

Terma jamoamiz bosh murabbiyi Saydali Yo'ldoshev esa musobaqa davomida amalga oshirgan strategiyasi, shaxmatchilarimizning partiyalar davomida qayd etgan natijalari haqida gapirib berdi.

Tadbir yakunida yosh shaxmatchilar va ularning murabbiyi munosib ishtirok uchun taqdirlanishdi.