Butunjahon shaxmat Olimpiadasida kumush medalni qo'lga kiritgan Nodira Nodirjonova ajratilgan mukofotlar haqida: "Bundan xafaman"

"[SHaxmatchi qizlarga avtomashina berilmaganidan], albatta, xafaman. [Parijda bo'lgan] yozgi Olimpiada ishtirokchilarini yaxshi taqdirlashdi, paralimpiyachilarni ham yaxshi taqdirlashdi. Kumush medalni olishim oson bo'lmadi, bor kuchim va energiyamni berib, harakat qildim", dedi sportchi.

Musobaqada bronza medallarini qo'lga kiritgan shaxmat bo'yicha O'zbekiston erkaklar terma jamoasiga "Prezident sovg'asi" sifatida BYD rusumli avtomobillar topshirildi.

34 yoshli Nodira Nodirjonova beshinchi taxtada 6 ta g'alaba va 2 ta durang qayd etib, ushbu taxtada kumush medalga ega chiqdi.

Malumot uchun, O'zbekiston Respublikasi Prezidentining 2022 yil 5 avgustdagi PQ-347 sonli qaroriga ko'ra, Nodirjonova Butunjahon shaxmat Olimpiadasida kumush medalni qo'lga kiritgani uchun bazaviy hisoblash miqdorining 1000 baravar miqdoridagi pul mukofoti bilan taqdirlanishi zarur.