Butunjahon shaxmat Olimpiadasida o'smirlarimiz muvaffaqiyatli odimlashmoqda

Ushbu musobaqada Saidali Yo'ldoshev murabbiyligi ostida yosh shaxmatchilarimiz Nodirbek Yoqubboev, Nodirbek Abdusattorov, Javohir Sindorov, SHamsiddin Vohidov va Sitora Saparovalar yurtimiz sharafini himoya qilishmoqda.

O'zbekiston terma jamoasi birinchi turda Vengriya termasini 4-0 hisobida mag'lub etdi. Nodirbek Abdusattorov (2560) birinchi doskada Ferenc Kombochni (2290) taslim qilgan bo'lsa, Nodirbek Yoqubboev (2549) ikkinchi doskada Endre Schikini (2282) mag'lub eta oldi. Javohir Sindorov (2513) uchinchi doskada Marsel Borxi (2201) ustidan zafar quchdi. Sitora Saparova (1848) to'rtinchi doskada reyting bo'yicha o'zidan ancha kuchli raqibi Agoston Yuxasni (2139) mag'lubiyatga uchratdi.

Ikkinchi turda esa shaxmatchilarimiz Polsha termasini 3-1 hisobida taslim etishdi. Nodirbek Abdusattorov (2560) birinchi doskada qora donalarda Yakub Kosakovskini (2413) taslim etdi. Nodirbek Yoqubboev (2549) ikkinchi doskada oq donalarda Kosma Pasan-Milexni (2334) ortda qoldirdi. SHamsiddin Vohidov (2456) uchinchi doskada o'zining ilk partiyasida g'alaba qozondi. U Miesko Mis (2307) ustidan zafar quchdi. Sitora Saparova (1848) to'rtinchi doskada oq donalarda Mariya Malichkaga (2013) imkoniyatni boy berib qo'ydi. Uchinchi raundda Moldova terma jamoasini 3,5-0,5 hisobida mag'lubiyatga uchratildi. To'rtinchi turda vakillarimiz amerikalik raqiblariga 1,5 - 2,5 hisobida imkoniyatni boy berib qo'ydilar.

Endi hamyurtlarimiz beshinchi tur o'yinlarini Rossiya terma jamoasiga qarshi o'tkazadilar.