Champions Chess Tour. Nodirbek Abdusattorov 3-o'rin va 50 ming dollarga ega chiqdi

Umumiy mukofot jamg'armasi 500 000 AQSH dollarini tashkil etuvchi ushbu musobaqaning final bosqichida dunyoning sakkiz nafar kuchli grossmeysteri qatorida hamyurtimiz Nodirbek Abdusattorov (2727) ham ishtirok etayotgan edi. 

Kecha yarim final bosqichining juftliklardagi ikkinchi set bahslari o'tkazildi va finalga yo'l olgan grossmeysterlar nomi malum bo'ldi. Kutilganidek, birinchi juftlikda amaldagi jahon chempioni Magnus Karlsen amerikalik Fabiano Karuanani 3:2 hisobida mag'lubiyatga uchratdi. 

Ikkinchi yarim finalda esa Nodirbek birinchi setdagi ustunligini saqlab qola bilmadi. Amerikalik nomdor raqib Uesli So ikkinchi setda 2,5:1,5 hisobida zafar quchib, umumiy hisobgi tenglashtirdi. G'olib nomini aniqlab bergan uchinchi setning ikki partiyasida durang natija qayd etildi. Finalchini aniqlagan Armageddon partiyasida esa Nodirbek yaxshi poziciyaga ega bo'lsa-da, birgina yo'l qo'ygan xatosi tufayli mag'lubiyatga uchradi.

SHu tariqa, Nodirbek Abdusattorov nufuzli Champions Chess Tour musobaqasini uchinchi o'rinda yakunladi. SHuningdek, yosh grossmeysterimiz 50 ming AQSH dollari miqdoridagi mukofot pulini ham qo'lga kiritdi. Endi bosh sovrin uchun Magnus Karlsen va Uesli So bahs olib borishadi. Abdusattorov esa shu oy Samarqandda o'tkaziladigan rapid va blic yo'nalishidagi jahon chempionatiga tayyorgarlik ko'radi.