CHim ustida xokkey. Pokistondagi musobaqada muvaffaqiyatli qatnashgan sportchilarimiz yurtimizga qaytib kelishdi

Turnir davomida Afg'oniston, Nepal va Qozog'iston terma jamoalarini mag'lubiyatga uchratgan yigitlarimiz guruhda birinchi o'rinni qo'lga kiritishdi.

Bugun tunda ana shu musobaqada muvaffaqiyatli ishtirok etgan xokkeychilarimiz yurtimizga qaytib kelishdi. Ularni Islom Karimov nomidagi Toshkent xalqaro aeroportida Milliy olimpiya qo'mitasi prezidenti Umid Ahmadjonov, MOQ va O'zbekiston chim ustida xokkey federaciyasi mutasaddilari, sportchilarning yaqinlari va ommaviy axborot vositalari xodimlari kutib olishdi.

MOQ rahbari xokkeychilarimizni qutlar ekan, terma jamoaning Tokio Olimpiadasiga yo'l olishi uchun barcha sharoitlar yaratilishini aytib o'tdi.

"Sizlar qayd etgan natijadan barchamiz xursand bo'ldik. CHunki yurtboshimizning topshiriqlariga ko'ra nafaqat yakkakurash, balki jamoaviy sport turlaridan ham Olimpiya o'yinlari licenziyalarini qo'lga kiritishga, bunday sport turlarini yurtimizda rivojlantirishga harakat qilyapmiz. Bu yo'lda katta hajmdagi ish olib borilmoqda. SHunday ekan, Olimpiadaga licenziya olish uchun sizda juda yaxshi imkoniyat bor. Bundan buyon Milliy olimpiya qo'mitasi sizlarni har tomonlama qo'llab-quvvatlaydi. Terma jamoa azolariga Olimpiya stipendiyalari joriy etiladi. MOQning qo'llab-quvvatloviga, ko'magiga ishonishingiz mumkin", - dedi Umid Ahmadjonov.

Eslatib o'tamiz, Tokio 2020 Olimpiadasiga yo'llanma beruvchi musobaqa kelasi yil Hindistonda o'tkaziladi.

Malumot uchun, O'zbekiston xech qachon jamoaviy sport turlari bo'yicha Olimpiya o'yinlarida ishtirok etmagan. Umid qilamizki, chim ustida xokkeychilarimiz bu borada birinchi bo'lishadi va o'zbek sporti tarixiga kirishadi. Milliy olimpiya qo'mitasi bu yo'lda terma jamoamizga omad tilaydi.