CHiroqchida yangi zamonaviy sport obekti foydalanishga topshirildi

Prezidentimiz tomonidan yoshlar manaviyatini yuksaltirish va ularning bo'sh vaqtini mazmunli tashkil etish maqsadida ilgari surilgan 5 ta muhim tashabbusning ikkinchisi yo'nalishi bevosita jismoniy tarbiya va sportga yo'naltirilgan bo'lib, unda yoshlarni jismoniy chiniqtirish, ularning sport sohasida qobiliyatini namoyon qilishlari uchun zarur shart-sharoitlar yaratish ko'zda tutilgan.

O'zbekiston Respublikasi Prezidentining 2020 yil 10 yanvardagi “2020 - 2022 yillarda O'zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to'g'risida»gi qarori hamda O'zbekiston Respublikasi Vazirlar Mahkamasining 2019 yil 31 iyuldagi 654-F-sonli farmoyishi bilan Qashqadaryo viloyati CHiroqchi tumani «Yangiobod» mahallasida zamonaviy, qulay va ixcham sport majmuasi qurib, foydalanishga topshirildi.

Ushbu sport majmuasining ochilish marosimi ham ko'tarinki kayfiyatda bo'lib o'tdi. Yangidan qad rostlagan sport majmuasida mahalla sportchilari ishtirokida kurash, MMA, dzyudo va taekvondo bo'yicha chiqishlar namoyish etildi.

Endilikda bu maskanda shu atrofda istiqomat qiluvchi yuz nafardan ortiq o'g'il-qizlar sportning kurash, MMA, dzyudo, taekvondo turlari bilan muntazam shug'ullanish imkoniyatiga ega bo'lishdi.

Kelgusida bu kabi sport inshootlarini viloyatning barcha tuman, shahar va mahallarida barpo etgan holda yosh avlod, qolaversa aholining barcha qatlamlarini sog'lom turmush tarziga jalb etish maqsad qilingan.